શાહરૂખ અને ગૌરીખાનને નજીક લાવવામાં મારી ફિલ્મોએ મહત્વની ભુમિકા ભજવી'તી
નીલમ કોઠારીએ શાહરૂખ અને ગૌરીના સંબંધોને લઈને કર્યો મોટો ધડાકો, વર્ષો જૂનું રહસ્ય સામે આવ્યું
મુંબઈ, તા.૨: બોલિવૂડના સૌથી લોકપ્રિય કપલ્સમાં શાહરૂખ ખાન અને ગૌરી ખાનનું નામ મોખરે છે. ત્રણ દાયકાથી વધુ સમયથી સાથે રહેલી આ જોડીની પ્રેમ કહાની કોઈ ફિલ્મી પ્લોટથી ઓછી નથી. હાલમાં જ જાણીતી અભિનેત્રી નીલમ કોઠારીએ આ લવ સ્ટોરી સાથે જોડાયેલો એક એવો ખુલાસો કર્યો છે જેણે સોશિયલ મીડિયા પર ખળભળાટ મચાવી દીધો છે. નીલમના જણાવ્યા અનુસાર, શાહરૂખ અને ગૌરીને નજીક લાવવામાં તેની ફિલ્મોએ મહત્વની ભૂમિકા ભજવી હતી.
નીલમ કોઠારી તાજેતરમાં રિયાલિટી શો ‘ઇન્ડિયન આઇડોલ' ના ‘સ્પેશિયલ સીઝન ઓફ લવ' એપિસોડમાં મહેમાન તરીકે આવી હતી. અહીં તેણે જણાવ્યું કે જ્યારે તે ફિલ્મોમાં સક્રિય હતી, ત્યારે શાહરૂખ ખાન તેનો ઘણો મોટો પ્રશંસક હતો. નીલમે હસતા હસતા કહ્યું કે, કિંગ ખાન પોતે આ વાત સ્વીકારી ચૂકયા છે કે નીલમની ફિલ્મોએ તેમની લવ સ્ટોરીમાં બળતણનું કામ કર્યું હતું.નીલમે વધુમાં ઉમેર્યું કે, માત્ર શાહરૂખ જ નહીં પરંતુ ગૌરીને પણ નીલમનો અભિનય ખૂબ પસંદ હતો. આ જોડી જ્યારે ડેટિંગ કરી રહી હતી ત્યારે તેઓ અવારનવાર સાથે બેસીને નીલમની ફિલ્મો જોતા હતા. આ ફિલ્મો જોતી વખતે વિતાવેલો સમય જ તેમને એકબીજાની વધુ નજીક લાવ્યો હતો. આમ, પરોક્ષ રીતે નીલમ કોઠારી આ સુપરહિટ લવ સ્ટોરીનું નિમિત્ત બની હતી.
નીલમ ૮૦ અને ૯૦ ના દાયકાની સુપરસ્ટાર રહી ચૂકી છે. તેની જોડી ગોવિંદા સાથે ખૂબ જ લોકપ્રિય હતી. તેણે ‘ઇલ્ઝામ' , ‘લવ ૮૬' અને ‘હત્યા' જેવી હિટ ફિલ્મો આપી છે. લાંબા વિરામ બાદ નીલમ ફરીથી લાઇમલાઇટમાં આવી છે. તે તાજેતરમાં ઓટીટી સિરીઝ ‘બોલીવુડ વાઈવ્સ' માં જોવા મળી હતી. આ ઉપરાંત તે અક્ષય કુમારના શો ‘વ્હીલ ઓફ ફોર્ચ્યુન' માં પણ પોતાની સખીઓ ભાવના પાંડે અને મહીપ કપૂર સાથે દેખાઈ હતી.