મુંબઈ, તા. 02: OTT પ્લેટફોર્મ પર 'મિર્ઝાપુર' અને 'ત્રિપાઠી ખાનદાન'ની જે લોકપ્રિયતા છે, તેવી કદાચ બીજી કોઈ શ્રેણીની નથી. હવે ચાહકો માટે સૌથી મોટા સમાચાર સામે આવ્યા છે. 'મિર્ઝાપુર: ધ ફિલ્મ'નું શૂટિંગ સત્તાવાર રીતે પૂર્ણ થઈ ગયું છે. એક્સેલ એન્ટરટેઈનમેન્ટે સોશિયલ મીડિયા પર એક ખાસ વીડિયો શેર કરીને જાહેરાત કરી છે કે ફિલ્મનું ફાઈનલ શેડ્યૂલ પૂરું થઈ ચૂક્યું છે અને હવે આ ફિલ્મ પોસ્ટ-પ્રોડક્શન સ્ટેજમાં છે.

શું હશે ફિલ્મની વાર્તા?

જોકે નિર્માતાઓએ હજુ સુધી પ્લોટ વિશે ગુપ્તતા જાળવી છે, પરંતુ અહેવાલો મુજબ આ ફિલ્મ વેબ સિરીઝ કરતા 10 ગણી વધુ ભવ્ય હશે. એવી પણ ચર્ચા છે કે આ ફિલ્મ શ્રેણીની પ્રિકવલ (ભૂતકાળની વાર્તા) હોઈ શકે છે અથવા તો વર્તમાન સમયરેખાનો જ એક મોટો હિસ્સો હશે. જે રીતે OTT પર સત્તાની લડાઈ જોવા મળી હતી, મોટા પડદે તેનાથી પણ વધુ ખતરનાક અને લોહિયાળ ગેમ જોવા મળશે તે નક્કી છે.

સ્ટાર કાસ્ટમાં નવા ચહેરાઓની એન્ટ્રી:

ફિલ્મમાં 'કાલીન ભૈયા' તરીકે પંકજ ત્રિપાઠી, 'ગુડ્ડુ પંડિત' તરીકે અલી ફઝલ અને ચાહકોના પ્રિય દિવ્યેન્દુ (મુન્ના ભૈયા) ફરી જોવા મળશે. આ ઉપરાંત, આ વખતે 'પંચાયત' ફેમ જિતેન્દ્ર કુમાર (જીતુ ભૈયા) અને રવિ કિશન જેવા દમદાર કલાકારો પણ આ ફિલ્મમાં ગ્લેમર અને એક્શનનો તડકો લગાવશે.

પુનીત કૃષ્ણા દ્વારા લિખિત અને ગુરમીત સિંહ દ્વારા દિગ્દર્શિત આ ફિલ્મ પહેલા સિનેમાઘરોમાં ધૂમ મચાવશે અને ત્યારબાદ એમેઝોન પ્રાઇમ વિડિયો પર રિલીઝ થશે. ઓરમેક્સ સિનેમેટિક્સની 'મોસ્ટ અવેટેડ' લિસ્ટમાં આ ફિલ્મે અત્યારથી જ ટોચનું સ્થાન મેળવી લીધું છે. વર્ષ 2026માં આ 'મિર્ઝાપુર'ની વાર્તા મોટા પડદે જોવા માટે ચાહકોમાં ભારે ઉત્તેજના છે.