નવી દિલ્હી:બોલિવૂડમાં ક્યારેક એક નાનકડો શબ્દ પણ વર્ષો જૂની મિત્રતામાં તિરાડ પાડી શકે છે, તેનો જીવતો જાગતો પુરાવો અમિતાભ બચ્ચન અને કાદર ખાનનો સંબંધ છે. પડદા પર જેમની જોડીએ ‘અમર અકબર એન્થોની’ અને ‘મુકદ્દર કા સિકંદર’ જેવી બ્લોકબસ્ટર ફિલ્મો આપી, તેમની મિત્રતા પાછળથી માત્ર ‘સર જી’ શબ્દને કારણે તૂટી ગઈ હતી. દિવંગત અભિનેતા કાદર ખાને પોતે એક ઇન્ટરવ્યુમાં ખુલાસો કર્યો હતો કે આ જીદને કારણે તેમને ફિલ્મોમાંથી પણ કાઢી મૂકવામાં આવ્યા હતા.
કાદર ખાને જણાવ્યું હતું કે, જ્યારે અમિતાભ બચ્ચન રાજકારણમાં પ્રવેશ્યા અને સાંસદ બન્યા, ત્યારે ફિલ્મ સેટ પરનું વાતાવરણ અચાનક બદલાઈ ગયું હતું. એક દિવસ શૂટિંગ દરમિયાન એક દક્ષિણ ભારતીય નિર્માતાએ કાદર ખાનને પૂછ્યું, “શું તમે ‘સર જી’ ને મળ્યા?” કાદર ખાને નવાઈ પામીને પૂછ્યું કે કયા સર જી? ત્યારે નિર્માતાએ અમિતાભ બચ્ચન તરફ ઈશારો કર્યો. કાદર ખાન માટે આ આઘાતજનક હતું, કારણ કે તેઓ અમિતાભને વર્ષોથી ‘અમિત’ કહીને જ બોલાવતા હતા.
કાદર ખાનના મતે, “કોઈ વ્યક્તિ પોતાના મિત્ર કે ભાઈને અચાનક ‘સર’ કેવી રીતે કહી શકે?” સેટ પર દરેક વ્યક્તિ અમિતાભને ખુશ કરવા માટે ‘સર જી’ કહેવા લાગી હતી, પરંતુ કાદર ખાને પોતાની ખુદદારી જાળવી રાખી. પરિણામ એ આવ્યું કે તેમને ઘણી ફિલ્મોમાંથી બહાર કરી દેવામાં આવ્યા. કાદર ખાને કહ્યું હતું કે, “હું અમિતાભને ‘સર’ ન કહી શક્યો અને કદાચ એ જ કારણ હતું કે મારી અને તેમની વચ્ચે વાતચીત બંધ થઈ ગઈ. હું ‘ખુદા ગવાહ’ જેવી મોટી ફિલ્મમાં પણ આ જ કારણે નહોતો.”
કાદર ખાન માત્ર અભિનેતા જ નહીં, પણ અમિતાભની ઘણી સુપરહિટ ફિલ્મોના પટકથા અને સંવાદ લેખક પણ હતા. ‘પરવરિશ’, ‘નસીબ’ અને ‘સૂર્યવંશમ’ જેવી ફિલ્મોમાં સાથે કામ કર્યા પછી પણ, ઈગો અને માન-સન્માનની આ લડાઈમાં બોલિવૂડની એક શાનદાર જોડીનો અંત આવ્યો. આ કિસ્સો આજે પણ સિનેમા જગતમાં ચર્ચાનો વિષય છે કે કેવી રીતે પ્રોફેશનલ દુનિયામાં અંગત સંબંધો હોમાઈ જાય છે.