મુંબઈ:બોલિવૂડ સુપરસ્ટાર શાહરુખ ખાનની આઇકોનિક ફિલ્મ 'દેવદાસ' ફરી એકવાર મોટા પડદે રિલીઝ થવા માટે તૈયાર છે. આગામી ૬ ફેબ્રુઆરી, ૨૦૨૬ના રોજ આ ભવ્ય રોમેન્ટિક ડ્રામા સિનેમાઘરોમાં ફરી જોવા મળશે. આ સમાચારની સાથે જ શાહરુખ ખાનના તે નિવેદનો ચર્ચામાં આવ્યા છે, જેમાં તેમણે દેવદાસના પાત્રને ભજવવા માટે કેટલી મોટી કિંમત ચૂકવવી પડી હતી તે વિશે ખુલાસો કર્યો હતો.
શાહરુખ ખાને સ્વીકાર્યું હતું કે ૨૦૦૨માં 'દેવદાસ'નું પાત્ર ભજવવું તેમના કરિયરનો સૌથી મુશ્કેલ તબક્કો હતો. પાત્રમાં સંપૂર્ણપણે ડૂબી જવા માટે તેઓ લાંબા સમય સુધી તણાવ અને બેચેનીમાં રહ્યા હતા. તેમણે ચોંકાવનારો ખુલાસો કરતા કહ્યું હતું કે, ફિલ્મ પૂરી થયા પછી પણ દેવદાસની પીડા તેમના મનમાંથી ગઈ નહોતી અને તેના કારણે તેમને દારૂની આદત પડી ગઈ હતી, જે આ પાત્રની તેમના પર પડેલી સૌથી નકારાત્મક અસર હતી.
ફિલ્મ વિશે વાત કરતા શાહરુખ ભાવુક થઈ ગયા હતા. તેમણે કહ્યું કે, "મારા મનમાં હંમેશા એ ખ્યાલ રહે છે કે જો હું આવી મોટી અને યાદગાર ફિલ્મો કરીશ, તો સ્વર્ગમાં બેઠેલા મારા માતા-પિતા મને જોશે." શાહરુખને લાગે છે કે તેમની માતાને 'દેવદાસ' ફિલ્મ અને તેમનો અભિનય ખૂબ જ પસંદ આવ્યો હોત. આ પાત્ર અગાઉ દિલીપ કુમાર જેવા દિગ્ગજ કલાકારોએ ભજવ્યું હોવા છતાં, શાહરુખે ભણસાલીના વિઝન સાથે તેને એક અલગ ઓળખ આપી હતી.
શરતચંદ્ર ચટ્ટોપાધ્યાયની નવલકથા પર આધારિત આ ફિલ્મમાં એશ્વર્યા રાય બચ્ચન, માધુરી દીક્ષિત અને જેકી શ્રોફે પણ યાદગાર ભૂમિકાઓ ભજવી છે. હવે ૨૪ વર્ષ પછી, નવી પેઢીના દર્શકો પાસે પણ સિનેમાઘરમાં આ ભવ્ય સેટ, સુમધુર સંગીત અને દેવદાસ-પારોના અધૂરા પ્રેમની ગાથા માણવાની સુવર્ણ તક છે.