મુંબઈ: બોલિવૂડ અભિનેત્રી રિયા ચક્રવર્તી માટે છેલ્લા સાત વર્ષ કોઈ અગ્નિપરીક્ષાથી ઓછા નહોતા. સુશાંત સિંહ રાજપૂતના રહસ્યમય મૃત્યુ બાદ રિયા ડ્રગ કેસ, જેલવાસ અને નકારાત્મકતાના એવા ચક્રવ્યુહમાં ફસાઈ ગઈ હતી કે તેણે અભિનયનું સપનું હંમેશા માટે છોડી દેવાનો નિર્ણય કરી લીધો હતો. જોકે, હવે રિયાના જીવનમાં એક નવો સૂર્યોદય થયો છે. પ્રખ્યાત ફિલ્મ નિર્માતા હંસલ મહેતાની આગામી નેટફ્લિક્સ સિરીઝ "ફેમિલી બિઝનેસ" દ્વારા તે ફરી એકવાર કેમેરા સામે આવી રહી છે. આ વાપસી રિયા માટે માત્ર પ્રોફેશનલ કમબેક નથી, પરંતુ તેની માનસિક જીત પણ છે.

પોતાના સંઘર્ષના દિવસોને યાદ કરતા રિયાએ જણાવ્યું કે, જે વ્યવસાય માટે તેણે ૧૦ વર્ષ મહેનત કરી હતી તેને છોડી દેવો અત્યંત પીડાદાયક હતો. તેણે કબૂલાત કરી કે સુશાંતના અવસાન બાદ તે એટલી બધી માનસિક અને શારીરિક પીડામાં હતી કે તે અભિનય કરવા માટે સક્ષમ નહોતી. લાંબા સમય સુધી તેને ફિલ્મોમાં કોઈ કામ આપવા પણ તૈયાર નહોતું. આ હતાશામાંથી બહાર આવવા માટે તેણે અસંખ્ય 'થેરાપી સેશન્સ' લેવા પડ્યા હતા. રિયાના મતે, તેણે મનને મનાવી લીધું હતું કે હવે તે ક્યારેય અભિનેત્રી બની શકશે નહીં, પરંતુ નિયતિને કંઈક બીજું જ મંજૂર હતું.

ડિરેક્ટર હંસલ મહેતાએ રિયાને આ નવી સિરીઝમાં કામ કરવા માટે મનાવી લીધી હતી. રિયાએ જ્યારે હંસલ સરને કહ્યું કે તેણે એક્ટિંગ છોડી દીધી છે, ત્યારે તેમણે હકારાત્મક જવાબ આપતા કહ્યું હતું કે, "તો જ તારે આ કામ કરવું જોઈએ." લાંબા સમય બાદ શૂટિંગ સેટ પર પહોંચેલી રિયાએ આ અનુભવને સાયકલ ચલાવવા સાથે સરખાવ્યો હતો. તેણે કહ્યું કે જેવી રીતે એકવાર સાયકલ શીખ્યા પછી ક્યારેય ભુલાતી નથી, તેવી જ રીતે કેમેરા સામે જતાં જ તેની વર્ષોની આવડત આપોઆપ બહાર આવી ગઈ હતી. હવે તે અનિલ કપૂર અને વિજય વર્મા જેવા દિગ્ગજો સાથે સ્ક્રીન શેર કરતી જોવા મળશે.

મુશ્કેલ સમયમાં રિયાએ હિંમત હારવાને બદલે અન્ય રસ્તાઓ પણ શોધ્યા હતા. તેણે 'રોડીઝ' જેવા રિયાલિટી શોમાં જજ તરીકે કામ કર્યું અને પોતાનું સફળ પોડકાસ્ટ પણ શરૂ કર્યું. રિયા માને છે કે જો તેના પરિવાર અને મિત્રોનો સાથ ન હોત, તો તે કદાચ આ પરિસ્થિતિમાંથી ક્યારેય બહાર આવી શકી ન હોત. ડ્રગ કેસ બંધ થયા બાદ અને કાયદાકીય ગૂંચવણો ઉકેલાયા પછી, રિયા હવે પોતાના જીવનના બીજા અધ્યાય માટે સજ્જ છે. આ કમબેક માત્ર તેના ચાહકો માટે જ નહીં, પણ મુશ્કેલીઓ સામે લડતા દરેક વ્યક્તિ માટે એક પ્રેરણા સમાન છે.