મુંબઈ : બોલિવૂડની ગ્લેમરસ દુનિયામાં પોતાની ઓળખ બનાવ્યા બાદ હવે આયેશા શર્માએ સાહિત્યના આંગણે ડગ માંડ્યા છે. પોતાની મજબૂત સોશિયલ મીડિયા હાજરી અને સ્પષ્ટ વક્તા તરીકે જાણીતી આયેશા હવે એક લેખિકા તરીકે પદાર્પણ કરી રહી છે. પ્રતિષ્ઠિત પબ્લિશિંગ હાઉસ 'પેંગ્વિન રેન્ડમ હાઉસ ઇન્ડિયા' સાથે મળીને તે પોતાનું પ્રથમ પુસ્તક લોન્ચ કરવા જઈ રહી છે, જે તેની અભિનય કારકિર્દીથી તદ્દન અલગ અને ઊંડા આત્મનિરીક્ષણ પર આધારિત છે.

૧૦૦ વિચારોનો અનોખો સંગ્રહ

આયેશાનું આ પ્રથમ પુસ્તક કોઈ કાલ્પનિક વાર્તા નથી, પરંતુ શક્તિ, કોમળતા અને સ્વ-પ્રેમની આસપાસ વણાયેલા ૧૦૦ નાના અને ધ્યાનાત્મક વિચારોનો સંગ્રહ છે. ખાસ કરીને આજના સમયમાં થાક, આત્મ-શંકા અને સતત દોડધામ વચ્ચે પોતાની જાતને સાબિત કરવાના દબાણમાં જીવતા લોકો માટે આ પુસ્તક આશીર્વાદ સમાન સાબિત થશે. આ પુસ્તક કોઈ ઉપદેશ આપતું નથી, પરંતુ વાચકોને પોતાની લાગણીઓ સમજવા માટે એક શાંત જગ્યા પૂરી પાડે છે.

લાગણીઓને મળ્યા શબ્દો

પોતાની નવી સફર વિશે ભાવુક થતા આયેશા શર્માએ જણાવ્યું કે, "મારું માનવું છે કે યોગ્ય પુસ્તક હંમેશા યોગ્ય સમયે જ તમારી પાસે આવે છે. મને આશા છે કે જ્યારે તમને તેની સૌથી વધુ જરૂર હશે, ત્યારે આ પુસ્તક તમને મળી જશે. જો મારા લખેલા શબ્દો વાંચીને તમને એવું લાગે કે 'આ એ જ લાગણી છે જે હું લાંબા સમયથી અનુભવી રહ્યો હતો પણ વ્યક્ત કરી શકતો નહોતો', તો મારી મહેનત સફળ ગણાશે."

ડિજિટલ દુનિયાથી સાહિત્ય સુધી

આયેશા માટે લેખન એ તેની ડિજિટલ હાજરીનું જ એક વિસ્તરણ છે. સોશિયલ મીડિયા પર તે અવારનવાર માનસિક સ્વાસ્થ્ય અને આંતરિક સંતુલન વિશે વાતો કરતી હોય છે. હવે પુસ્તક દ્વારા તે પોતાના વિચારોને વધુ ઊંડાણપૂર્વક વાચકો સુધી પહોંચાડશે. અભિનય, ડિજિટલ કન્ટેન્ટ અને હવે લેખન - આ ત્રિવેણી સંગમ આયેશાની સર્જનાત્મક ઓળખને એક નવી ઊંચાઈ પર લઈ જશે.

સાહિત્યના રસીકો અને આયેશાના ચાહકો હવે આતુરતાથી તેના પુસ્તકની રાહ જોઈ રહ્યા છે, જે ભાગદોડ ભરી જિંદગીમાં શાંતિની એક પળ આપવાનું વચન આપે છે.