મુંબઈ: હિન્દી સિનેમાના 'ગ્રીક ગોડ' ગણાતા અભિનેતા ઋતિક રોશને આજે અત્યંત ભારે હૈયે પોતાના જીવનના સૌથી મહત્વના માર્ગદર્શક અને દિગ્ગજ ફિલ્મ નિર્માતા એમ.એમ. બેગને વિદાય આપી છે. 70 વર્ષની વયે અંધેરી સ્થિત નિવાસસ્થાને અંતિમ શ્વાસ લેનાર એમ.એમ. બેગ માત્ર એક ફિલ્મ સર્જક જ નહીં, પરંતુ ઋતિક રોશનના એવા ગુરુ હતા જેમણે એક શરમાળ છોકરાને આત્મવિશ્વાસથી છલોછલ અભિનેતામાં પરિવર્તિત કર્યો હતો. ઋતિકે સોશિયલ મીડિયા પર એક લાંબી પોસ્ટ લખીને જણાવ્યું હતું કે, જ્યારે તે માત્ર 18 વર્ષના હતા અને પોતાની બોલવાની ક્ષમતા (Speech) ને લઈને અસમંજસમાં હતા, ત્યારે બેગ સાહેબે જ તેમને રસ્તો બતાવ્યો હતો.
ઋતિકે પોતાની શ્રદ્ધાંજલિમાં લખ્યું કે, "મારા પ્રિય બેગજી, એક કલાકાર તરીકેની મારી સફરમાં તમે જે આત્મવિશ્વાસ જગાડ્યો છે તે માટે હું હંમેશા તમારો ઋણી રહીશ. તમે મને મારા અવાજના ઉતાર-ચઢાવ અને સંવાદો પર પકડ મેળવવામાં મદદ કરી. આજે પણ હું તમારા દ્વારા શીખવવામાં આવેલા પાઠનો અભ્યાસ કરું છું." ઉલ્લેખનીય છે કે, 'કહો ના પ્યાર હૈ' દ્વારા ડેબ્યુ કરતા પહેલા ઋતિકે એમ.એમ. બેગ પાસેથી જ એક્ટિંગ અને ડિક્શનની ટ્રેનિંગ લીધી હતી.
એમ.એમ. બેગે પોતાની કારકિર્દીમાં રાકેશ રોશન અને જે. ઓમપ્રકાશ જેવા દિગ્ગજો સાથે કામ કર્યું હતું. તેમણે 'આદમી ખિલોના હૈ' અને 'કાલા બજાર' જેવી ફિલ્મોમાં સહાયક તરીકે સેવા આપી હતી, જ્યારે 'છોટી બહુ' જેવી ફિલ્મોનું સ્વતંત્ર નિર્દેશન પણ કર્યું હતું. એટલું જ નહીં, 80ના દાયકાની સુપરહિટ બાળ કલાકાર બેબી ગુડ્ડુ (શાહિંદા બેગ) પણ તેમની જ પુત્રી છે. ઋતિકે બેગ પરિવાર પ્રત્યે સંવેદના વ્યક્ત કરતા કહ્યું કે, તેમની ખોટ ક્યારેય પુરાશે નહીં, પરંતુ તેમના સંસ્કારો અને પાઠ હંમેશા તેમની કલામાં જીવંત રહેશે.