મુંબઈ, તા.૨૩: બોલિવૂડના પાવરહાઉસ ગણાતા રણવીર સિંહની એક્શન પેક્ડ ફિલ્મ 'ધુરંધર' ના પહેલા ભાગે બોક્સ ઓફિસ પર જે રીતે ધમાકો કર્યો હતો, ત્યારબાદ હવે તેની સિક્વલ 'ધુરંધર 2' ને લઈને ચર્ચાઓએ જોર પકડ્યું છે. આ ફિલ્મમાં જે પાત્રના માત્ર નામથી જ લોકોમાં દહેશત હતી, તે 'બડે સાબ' ખરેખર કોણ છે? તે રહસ્ય હવે ટૂંક સમયમાં જ સિનેમાઘરોમાં ખુલવા જઈ રહ્યું છે.
શું ઈમરાન હાશ્મી બનશે 'બડે સાબ'?
ફિલ્મના પહેલા ભાગમાં 'બડે સાબ' પાત્રની રહસ્યમયી એન્ટ્રી રાખવામાં આવી હતી. હવે અફવાઓ અને લીક થયેલી કાસ્ટિંગ લિસ્ટ મુજબ, બોલિવૂડના સ્ટાઇલિશ એક્ટર ઇમરાન હાશ્મી આ ભૂમિકામાં જોવા મળી શકે છે. જોકે મેકર્સ દ્વારા હજુ સત્તાવાર મહોર મારવામાં આવી નથી, પરંતુ ઈમરાનના નામની ચર્ચાએ ચાહકોમાં ફિલ્મને લઈને ઉત્સુકતા બમણી કરી દીધી છે.
વાર્તામાં હશે પાકિસ્તાન વિરોધી મિશનનો રોમાંચ
'ધુરંધર 2' ની વાર્તા અત્યંત રોમાંચક રહેવાની છે. અહેવાલો મુજબ, ફિલ્મ "બ્લીડ પાકિસ્તાન વિથ ૧૦૦૦ કટ્સ" નામના બળવાખોરી વિરોધી મિશન પર આધારિત છે. જેમાં શેર-એ-બલોચ બનતા હમઝા અલી મજારી ઉર્ફે જસકીરત સિંહની વાર્તા દર્શાવવામાં આવશે. ફિલ્મમાં મેજર ઇકબાલ અને એસપી ચૌધરી અસલમની ભૂમિકા અત્યંત મહત્વની રહેશે, જેઓ જસકીરતની અસલી ઓળખ ઉજાગર કરવા માટે મેદાનમાં ઉતરશે.
ફિલ્મની સ્ટારકાસ્ટ અને ખાસિયત:
•    મુખ્ય કલાકારો: રણવીર સિંહ, અર્જુન રામપાલ, આર. માધવન અને સંજય દત્ત.
•    નવા ચહેરા: યામી ગૌતમ એક શક્તિશાળી ગુપ્તચર એજન્ટ તરીકે જોવા મળશે, જ્યારે રાજ ઝુત્શી પાકિસ્તાની જનરલની ભૂમિકા ભજવશે.
•    રીલીઝ ડેટ: આ ફિલ્મ આવતા મહિને એટલે કે ૧૯ માર્ચ ના રોજ વિશ્વભરના સિનેમાઘરોમાં રિલીઝ થવાની તૈયારીમાં છે.
બોક્સ ઓફિસ પર ધમાકાની તૈયારી
ડિસેમ્બર ૨૦૨૫ માં આવેલી આ ફિલ્મની પ્રથમ કડીએ કમાણીના તમામ રેકોર્ડ તોડી નાખ્યા હતા. હવે જ્યારે યામી ગૌતમ અને સંજય દત્ત જેવા દિગ્ગજો પણ આ મિશનમાં જોડાવાના છે, ત્યારે 'ધુરંધર 2' થી બોક્સ ઓફિસ પર ફરી એકવાર રણવીર સિંહનું વર્ચસ્વ જોવા મળશે તેવું લાગી રહ્યું છે.