મુંબઈ, તા. ૨૬: લોકપ્રિય રિયાલિટી શો 'ધ ૫૦' માંથી વહેલી વિદાય લેનાર ભોજપુરી ક્વીન મોનાલિસા અત્યારે સોશિયલ મીડિયા પર છવાયેલી છે. શોના મહેલમાંથી બહાર આવ્યા બાદ એક ખાસ વાતચીતમાં મોનાલિસાએ શોના અનુભવો અને સ્પર્ધકો વિશે હચમચાવી દેનારા ખુલાસા કર્યા છે. મોનાલિસાએ સ્પષ્ટ કર્યું કે ભલે તે શોમાંથી બહાર થઈ ગઈ હોય, પરંતુ તેના દિલના ધબકારા હજુ પણ શોમાં રહેલા તેના પતિ વિક્રાંત સિંહ માટે તેટલા જ તેજ છે.

મોનાલિસાએ શોની સરખામણી કુસ્તીના મેદાન સાથે કરતા કહ્યું કે, "ક્યારેક મને એવું લાગતું હતું કે હું કોઈ રિયાલિટી શોમાં નહીં પણ કુસ્તીની રિંગમાં આવી ગઈ છું. ત્યાંનું વાતાવરણ એટલું તંગ બની જતું કે હું ઘણીવાર નિરાશ થઈ જતી." શોમાં સ્પર્ધકોના વર્તન પર નારાજગી વ્યક્ત કરતા તેણે ઉમેર્યું કે રજત જેવા સ્પર્ધકો જે રીતે વિક્રાંત માટે અયોગ્ય ભાષા વાપરતા હતા, તે જોઈને તેનું લોહી ઉકળી ઉઠતું હતું.

જ્યારે તેને પૂછવામાં આવ્યું કે શિવા ઠાકરે કે વિક્રાંત, કોણ આ ટ્રોફીનો અસલી હકદાર છે? ત્યારે મોનાલિસાએ ખૂબ જ સમજદારીપૂર્વક જવાબ આપ્યો. તેણે કહ્યું, "શિવા અદ્ભુત ખેલાડી છે અને ખૂબ મહેનતુ છે, જો તે જીતે તો તે ગર્વની વાત હશે. પરંતુ એક પત્ની તરીકે અને વિક્રાંતની રમત જોઈને, હું તેને જ વિજેતા તરીકે જોવા માંગુ છું." પતિ-પત્નીના સંબંધો પર ઉઠતા સવાલો પર પૂર્ણવિરામ મૂકતા તેણે કહ્યું કે ૧૮ વર્ષનો સાથ અને અતૂટ વિશ્વાસ એ જ તેમના સંબંધનો પાયો છે, બાકી બધી વાતો ગૌણ છે.

શોમાં નિક્કી તંબોલીની સર્જરી પર કરવામાં આવેલી ટિપ્પણી અંગે પણ મોનાલિસાએ ખુલીને પોતાનો પક્ષ રાખ્યો. તેણે કહ્યું કે કોઈના દેખાવ પર નિશાન સાધવું કે તેનું અપમાન કરવું તે તદ્દન ખોટું છે. દરેક વ્યક્તિને સુંદર દેખાવાનો હક છે અને આપણે તેમની પસંદગીનો આદર કરવો જોઈએ. ભલે દર્શકો આ શોને 'પ્રાણી સંગ્રહાલય' કહેતા હોય, પણ મોનાલિસાના મતે આ ૫૦ અલગ-અલગ વ્યક્તિત્વોનો એક અનોખો પ્રયોગ છે જે દર્શકોને ચોક્કસ જ જકડી રાખશે.