મુંબઈ, તા. ૨૬: બોલિવૂડના અસલી 'ખેલાડી' અક્ષય કુમાર ફરી એકવાર દર્શકોને હસાવવા અને ડરાવવા માટે તૈયાર છે. તેની મોસ્ટ અવેટેડ હોરર-કોમેડી ફિલ્મ "ભૂત બાંગ્લા" ને લઈને ચાહકોમાં પહેલેથી જ ભારે ક્રેઝ જોવા મળી રહ્યો છે, ત્યારે આજે નિર્માતાઓએ ફિલ્મનું પ્રથમ ધમાકેદાર ગીત "રામ જી આકે ભલા કરેંગે" રિલીઝ કરીને સોશિયલ મીડિયા પર આગ લગાવી દીધી છે. આ ગીતમાં અક્ષય કુમાર ભૂતિયા દુનિયાની વચ્ચે પોતાની સિગ્નેચર કોમિક સ્ટાઇલમાં મસ્તી કરતો જોવા મળી રહ્યો છે.

ગીતની વાત કરીએ તો, પ્રીતમ દ્વારા કમ્પોઝ કરાયેલું આ ટ્રેક જેટલું મજેદાર છે તેટલું જ કેચી પણ છે. અરમાન મલિક અને અરવનના અવાજમાં આ ગીત એક અલગ જ ઉર્જા લાવે છે. સૌથી વધુ આકર્ષક બાબત એ છે કે ગીતમાં એક રેપ સેક્શન પણ ઉમેરવામાં આવ્યો છે, જે તેને આજની પેઢી માટે વધુ રોમાંચક બનાવે છે. વીડિયોમાં અક્ષય અતરંગી ભૂતો સાથે એવી રીતે હરકતો કરે છે કે તમે હસ્યા વગર રહી શકશો નહીં.

મહત્વની વાત એ છે કે, આ ફિલ્મ દ્વારા અક્ષય કુમાર અને દિગ્દર્શક પ્રિયદર્શનની સુપરહિટ જોડી આશરે ૧૬ વર્ષ પછી ફરી સાથે આવી રહી છે. 'હેરા ફેરી' અને 'ભૂલ ભુલૈયા' જેવી ક્લાસિક ફિલ્મો આપનાર આ જોડી પાસેથી ચાહકોને ફરી એકવાર સુપરહિટની આશા છે. ખાસ કરીને અક્ષય માટે આ ફિલ્મ ખૂબ મહત્વની છે, કારણ કે તેની છેલ્લી ફિલ્મ 'જોલી એલએલબી ૩' બોક્સ ઓફિસ પર ખાસ કમાલ કરી શકી નહોતી.

આ ફિલ્મ ૧૦ એપ્રિલે સિનેમાઘરોમાં રિલીઝ થવાની છે. ગીતના રિસ્પોન્સને જોતા લાગે છે કે "ભૂત બાંગ્લા" બોક્સ ઓફિસ પર કમાણીના તમામ રેકોર્ડ તોડવા માટે સજ્જ છે. હવે જોવાનું એ રહેશે કે ભૂતોની આ ટોળી સાથે અક્ષય કુમાર પ્રેક્ષકોના દિલ જીતવામાં કેટલો સફળ રહે છે.