મુંબઈ: કેરળ હાઈકોર્ટે વિવાદાસ્પદ ફિલ્મ 'ધ કેરળ સ્ટોરી 2: ગોઝ બિયોન્ડ' ની રિલીઝ પર 15 દિવસનો વચગાળાનો સ્ટે લગાવ્યો છે, જેના કારણે ફિલ્મ તેની નિર્ધારિત રિલીઝ તારીખે થિયેટરોમાં રિલીઝ થઈ શકતી નથી. કેરળ હાઈકોર્ટમાં સુનાવણી દરમિયાન ફિલ્મના નિર્માતાઓને મોટો ઝટકો લાગ્યો હતો. કોર્ટે સેન્ટ્રલ બોર્ડ ઓફ ફિલ્મ સર્ટિફિકેશન (CBFC) ને અરજદારોના વાંધાઓ પર વિચાર કરવા અને બે અઠવાડિયામાં નિર્ણય લેવાનો નિર્દેશ આપ્યો હતો. ફિલ્મ સામે દાખલ કરાયેલી ત્રણ અરજીઓમાં સેન્સર સર્ટિફિકેટ રદ કરવા અને તેની રિલીઝ પર રોક લગાવવાની માંગ કરવામાં આવી હતી. અરજદારોએ દલીલ કરી હતી કે 'ધ કેરળ સ્ટોરી 2: ગોઝ બિયોન્ડ' રાજ્યને નકારાત્મક રીતે રજૂ કરે છે અને સાંપ્રદાયિક તણાવ વધારી શકે છે.કેસની સુનાવણી કરતા, જસ્ટિસ કુરિયન થોમસની સિંગલ બેન્ચે પ્રથમ દ્રષ્ટિએ ટિપ્પણી કરી કે CBFC એ ફિલ્મને સર્ટિફિકેટ આપવામાં યોગ્ય કાળજી લીધી નથી.કોર્ટે સ્પષ્ટ કર્યું કે જ્યાં સુધી CBFC અરજદારોની રિવિઝન અરજી પર નવો આદેશ જારી ન કરે ત્યાં સુધી ફિલ્મની રિલીઝ પરનો સ્ટે ચાલુ રહેશે.