મુંબઈ: તા.૨૭: હાલમાં જ્યારે 'ધ કેરળ સ્ટોરી 2' ની રિલીઝ પર કેરળ હાઈકોર્ટે વચગાળાનો સ્ટે મૂક્યો છે, ત્યારે બોલિવૂડમાં ફરી એકવાર અભિવ્યક્તિની આઝાદી અને ધાર્મિક લાગણીઓ વચ્ચેનો જંગ તેજ બન્યો છે. આ ઘટનાએ વર્ષ ૨૦૧૫માં સની દેઓલની ફિલ્મ 'મોહલ્લા અસ્સી' સાથે થયેલા અન્યાયની યાદો તાજી કરી દીધી છે. વારાણસીના અસ્સી ઘાટની પૃષ્ઠભૂમિ પર બનેલી આ ફિલ્મ પણ આવી જ રીતે ૪ વર્ષ સુધી કાયદાકીય ગૂંચવણોમાં ફસાઈ રહી હતી અને અંતે બોક્સ ઓફિસ પર દમ તોડી દીધો હતો.

શું હતો 'મોહલ્લા અસ્સી' નો વિવાદ?

ચંદ્રપ્રકાશ દ્વિવેદીના નિર્દેશનમાં બનેલી આ ફિલ્મમાં વારાણસીના રાજકારણ, સંસ્કૃતિ અને ત્યાંના લોકોના જીવનને વ્યંગાત્મક રીતે રજૂ કરવામાં આવ્યું હતું. વિવાદનું મુખ્ય કારણ ફિલ્મમાં વપરાયેલી ભાષા હતી. બનારસી લહેકામાં બોલાતા અપશબ્દો અને એક દ્રશ્યમાં ભગવાન શિવનો વેશ ધારણ કરેલ વ્યક્તિને અપશબ્દો બોલતા બતાવવામાં આવતા હિન્દુ સંગઠનો લાલઘૂમ થયા હતા. સની દેઓલ, જે પોતાની ગંભીર છબી માટે જાણીતા છે, તેમને પણ ફિલ્માં ગાળો બોલતા જોઈ લોકો ચોંકી ગયા હતા.

કાશીમાં ઉગ્ર વિરોધ અને ૪ વર્ષનો વનવાસ

વારાણસીમાં આ ફિલ્મ સામે ભારે વિરોધ પ્રદર્શનો થયા હતા. પોસ્ટરો ફાડવામાં આવ્યા અને અલ્હાબાદ હાઈકોર્ટથી લઈને સુપ્રીમ કોર્ટ સુધી અરજીઓનો મારો ચાલ્યો. આરોપ હતો કે આ ફિલ્મ હિન્દુ ધર્મની છબી ખરાબ કરે છે. જોકે, સેન્સર બોર્ડ (CBFC) એ ફિલ્મને 'A' સર્ટિફિકેટ આપી દીધું હતું, છતાં સામાજિક દબાણ હેઠળ તેની રિલીઝ ૨૦૧૫ થી ૨૦૧૮ સુધી અટકી રહી.

કોર્ટે આપી મંજૂરી પણ સમય હાથમાંથી નીકળી ગયો

લાંબી કાયદાકીય લડત બાદ ૨૦૧૮માં સુપ્રીમ કોર્ટે ફિલ્મને રિલીઝ કરવાની મંજૂરી આપી હતી. કોર્ટે સ્પષ્ટ કર્યું હતું કે સેન્સર બોર્ડનું પ્રમાણપત્ર માન્ય છે અને તેમાં કંઈ વાંધાજનક નથી. પરંતુ, ૪ વર્ષના વિલંબને કારણે ફિલ્મ પ્રત્યેનો ઉત્સાહ ઓસરી ગયો હતો. યોગ્ય પ્રચારના અભાવે આ શાનદાર ફિલ્મ બોક્સ ઓફિસ પર ફ્લોપ સાબિત થઈ. વિવેચકોએ સની દેઓલના અભિનયના ખૂબ વખાણ કર્યા, પરંતુ આર્થિક રીતે ફિલ્મને મોટું નુકસાન થયું.

કેરળ સ્ટોરી 2 સાથે સમાનતા

આજે ફરી 'ધ કેરળ સ્ટોરી 2' સાથે આવું જ કંઈક બની રહ્યું છે. ફરક માત્ર એટલો છે કે 'મોહલ્લા અસ્સી' માં કોર્ટે નિર્માતાઓનો પક્ષ લીધો હતો, જ્યારે 'કેરળ સ્ટોરી 2' માં કોર્ટે સેન્સર બોર્ડની પ્રક્રિયા પર જ સવાલો ઉઠાવ્યા છે. હવે જોવાનું એ રહેશે કે શું આ ફિલ્મ પણ 'મોહલ્લા અસ્સી' ની જેમ વિવાદોમાં હોમાઈ જશે કે પછી પ્રેક્ષકો સુધી પહોંચવામાં સફળ રહેશે.