મુંબઈ: તા.૨૭: ભારતીય સિનેમાની બે લોકપ્રિય અભિનેત્રીઓ, સમાન્થા રૂથ પ્રભુ અને પ્રિયંકા ચોપરા જોનાસ હાલમાં સોશિયલ મીડિયા પર ચર્ચાનું કેન્દ્ર બની છે. સમાન્થાએ તાજેતરમાં પ્રિયંકા ચોપરાના એક ઇન્ટરવ્યુની ક્લિપ શેર કરીને તેની હિંમત અને સ્પષ્ટવક્તાના વખાણ કર્યા છે. આ ઇન્ટરવ્યુમાં પ્રિયંકાએ ૨૦૨૨ માં તેની પુત્રી માલતી મેરીના અકાળ જન્મ (Pre-mature birth) અને તે સમયે તેની સાથે થયેલી ભાવનાત્મક ઉથલપાથલ વિશે દિલ ખોલીને વાત કરી હતી.

૨૭ અઠવાડિયામાં જ થયો હતો પુત્રીનો જન્મ

પ્રિયંકાએ ઇન્ટરવ્યુમાં ભાવુક થતા જણાવ્યું કે, તેની પુત્રી માલતી મેરીનો જન્મ નિર્ધારિત સમય કરતા ઘણો વહેલો, એટલે કે માત્ર ૨૭ અઠવાડિયામાં જ થઈ ગયો હતો. પ્રિયંકાએ કહ્યું, "જ્યારે મને ખબર પડી કે ડિલિવરી આટલી જલ્દી થઈ રહી છે, ત્યારે હું સ્તબ્ધ થઈ ગઈ હતી. અમે મનથી બિલકુલ તૈયાર નહોતા કારણ કે અમને ખબર નહોતી કે બાળક સાથે શું થશે અને તેની તબિયત કેવી રહેશે."

સમાચાર જાહેર કરવા માટે કરાયું હતું દબાણ

વધુમાં પ્રિયંકાએ ખુલાસો કર્યો કે, તે અને નિક જોનાસ તેમની પુત્રીના સ્વાસ્થ્યને લઈને ચિંતિત હતા, ત્યારે જ તેમને જાણ કરવામાં આવી હતી કે આ સમાચાર ગમે ત્યારે જાહેર થઈ શકે છે. પ્રિયંકાએ કહ્યું કે, "અમને ફરજ પાડવામાં આવી હતી કે અમે તેના જન્મની જાહેરાત કરીએ, જ્યારે અમે માનસિક રીતે તે માટે તૈયાર નહોતા." ઉલ્લેખનીય છે કે, જાન્યુઆરી ૨૦૨૨ માં સરોગસી દ્વારા માલતી મેરીનું આ દુનિયામાં સ્વાગત કરવામાં આવ્યું હતું.

સમાન્થાએ વ્યક્ત કર્યો આભાર

સમાન્થાએ પ્રિયંકાના આ વીડિયોને શેર કરતા લખ્યું કે, “ખૂબ જ સુંદર. આભાર @priyankachopra. તમારી પ્રામાણિકતા ખરેખર શક્તિશાળી છે. મને આ ઇન્ટરવ્યુ ખૂબ જ ગમ્યો.” સમાન્થાના આ શબ્દો દર્શાવે છે કે તે પ્રિયંકાની પીડા અને તેની હિંમત સાથે પોતાની જાતને જોડી શકી છે.

રસપ્રદ વાત એ છે કે, આ બંને અભિનેત્રીઓ એમેઝોન પ્રાઇમની ગ્લોબલ સ્પાય સિરીઝ 'સિટાડેલ' (Citadel) બ્રહ્માંડ સાથે જોડાયેલી છે. પ્રિયંકાએ તેના આંતરરાષ્ટ્રીય વર્ઝનમાં કામ કર્યું છે, જ્યારે સમાન્થા તેના ભારતીય સંસ્કરણ 'સિટાડેલ: હની બની' માં જાસૂસની ભૂમિકા ભજવતી જોવા મળે છે.