મુંબઈ : બોલિવૂડમાં પોતાના અવાજથી કરોડો દિલો પર રાજ કરનાર અરિજિત સિંહે તાજેતરમાં જ પ્લેબેક સિંગિંગમાંથી નિવૃત્તિની જાહેરાત કરીને ચાહકોને આંચકો આપ્યો હતો. પરંતુ, સંગીતપ્રેમીઓ માટે સારા સમાચાર એ છે કે અરિજિત ભલે ફિલ્મો માટે ગાવાનું છોડી રહ્યો હોય, પણ તેનો અવાજ ગુંજતો રહેશે. નિવૃત્તિની જાહેરાત બાદ અરિજિત સિંહે પોતાનું પ્રથમ સ્વતંત્ર (Independent) ગીત 'રૈના' રિલીઝ કર્યું છે, જેણે રિલીઝ થતાની સાથે જ ઇન્ટરનેટ પર ધૂમ મચાવી દીધી છે.

સંગીતકાર શેખર રાવજિયાણી દ્વારા રચિત આ ગીત 'રૈના' ૨૭ ફેબ્રુઆરીએ લોન્ચ કરવામાં આવ્યું હતું. પ્રિયા સરૈયાના સુંદર શબ્દો અને અરિજિતના મખમલી અવાજે આ ગીતને એક અલગ જ ઊંચાઈ પર પહોંચાડ્યું છે. આ ટ્રેકને 'રાત જેવી રહસ્યમય અને અનંત રોમેન્ટિક લિજ્જત' તરીકે વર્ણવવામાં આવ્યો છે. સોશિયલ મીડિયા પર ચાહકો આ ગીત સાંભળીને ખુશીથી ઝૂમી ઉઠ્યા છે અને ટિપ્પણી કરી રહ્યા છે કે, "આ અરિજિત સિંહનો બીજો અવતાર છે - વધુ મીઠો અને ભાવનાત્મક!"

શું ખરેખર હવે અરિજિતનો અવાજ ફિલ્મોમાં નહીં સંભળાય?

અરિજિત સિંહે ૨૭ જાન્યુઆરીએ ઇન્સ્ટાગ્રામ પર એક પોસ્ટ દ્વારા પ્લેબેક સિંગિંગમાંથી નિવૃત્તિની જાહેરાત કરી હતી. જોકે, તેણે સ્પષ્ટતા કરી છે કે તેના ઘણા અપ્રકાશિત અને અધૂરા ગીતો હજુ પાઇપલાઇનમાં છે, જે આ વર્ષ અને આવતા વર્ષ દરમિયાન ફિલ્મોમાં રિલીઝ થતા રહેશે. હાલમાં જ આમિર ખાન પ્રોડક્શનની ફિલ્મ 'એક દિન'માં પણ તેનો અવાજ સંભળાયો છે.

પરંતુ હવે અરિજિતનું મુખ્ય ધ્યાન સ્વતંત્ર સંગીત અને પોતાની સંગીત યાત્રાને નવી દિશા આપવા પર છે. 'રૈના' ગીત એ વાતનો પુરાવો છે કે અરિજિત ભલે બોલિવૂડના પડદા પાછળથી નિવૃત્ત થઈ રહ્યો હોય, પણ એક સ્વતંત્ર કલાકાર તરીકે તેની સફર હવે વધુ તેજ બનવાની છે. ચાહકો માટે આ ગીત માત્ર એક ટ્રેક નથી, પણ એક એવી લાગણી છે જે સાબિત કરે છે કે 'કિંગ' ક્યારેય નિવૃત્ત થતો નથી.