મુંબઈ : બોલિવૂડમાં ભવ્ય સેટ્સ અને યાદગાર પ્રેમકથાઓ આપવા માટે જાણીતા દિગ્દર્શક-નિર્માતા કરણ જોહર ફરી એકવાર ચર્ચામાં છે, પણ આ વખતે કોઈ ફિલ્મ માટે નહીં પરંતુ પોતાની પર્સનલ લાઈફ માટે. દુનિયાને રોમાન્સ શીખવનાર કરણ પોતે કેમ સિંગલ છે? આ સવાલનો જવાબ તેણે પોતે જ ખૂબ જ રમુજી અને સ્ટાઈલિશ અંદાજમાં સોશિયલ મીડિયા પર આપ્યો છે.
કવિતાના બહાને છલકાયું 'સિંગલ' હોવાનું દર્દ
મંગળવારે કરણ જોહરે ઈન્સ્ટાગ્રામ પર કેટલીક મિરર સેલ્ફી પોસ્ટ કરી હતી, જેમાં તે ક્યારેક લિફ્ટમાં તો ક્યારેક સ્ટાઈલિશ ફર કોટમાં પોઝ આપતો જોવા મળે છે. તેણે કેપ્શનમાં કવિતા લખતા જણાવ્યું કે, "પવનમાં ઠંડક છે અને હૃદયમાં થોડી હૂંફ, પ્રેમની મોસમ આવવાની તૈયારીમાં છે..." પણ તરત જ રમુજી વળાંક લેતા તેણે ઉમેર્યું કે, "આ તો માત્ર કવિતા છે, કારણ કે સિંગલ રહેવું એ જ મારી કાયમી જીંદગી છે. હું ફોટામાં પોઝ આપીને ખાલી જગ્યા ભરવાનો પ્રયત્ન કરું છું."
સોશિયલ મીડિયા રીલ્સ બન્યા સાથી
કરણે મજાકમાં સ્વીકાર્યું કે તેની એકલતામાં હવે સોશિયલ મીડિયા રીલ્સ જ તેના સાથી બની ગયા છે. તેણે લખ્યું કે તે દિવસ-રાત બસ રીલ્સ સ્ક્રોલ કર્યા કરે છે. તેણે વધુમાં ઉમેર્યું, "આ કવિતા સાંભળવામાં સરળ લાગે છે, પણ તેની પાછળ એક સત્ય છુપાયેલું છે. જો હું વધુ કહીશ તો તમે મને પાગલ સમજશો." કરણની આ પોસ્ટ પરથી જણાય છે કે તે ક્યારેક એકલતા અનુભવે છે, પણ તેને વ્યક્ત કરવાની તેની શૈલી હંમેશાની જેમ લાજવાબ છે.
ફરાહ ખાન અને મીની માથુરની મજેદાર કમેન્ટ્સ
કરણની આ પોસ્ટ પર તેના બોલિવૂડ મિત્રોએ પણ મજા લેવાનું ચૂક્યું નથી. તેની ખાસ મિત્ર ફરાહ ખાને ટિપ્પણી કરી કે, "શું તું તારા બિલ્ડિંગની લિફ્ટમાં જ આ બધા ફોટા પાડી રહ્યો છે?" જ્યારે મીની માથુરે લખ્યું કે, "પ્રિય કરણ, તારો શિયાળો ઠંડો હોઈ શકે પણ તારા જેકેટ અને ચશ્મા તો અદ્ભુત છે! જે કપડાં તું હવે નથી પહેરતો તે મને આપી દે."
કરણ જોહર તેની લક્ઝુરિયસ લાઈફસ્ટાઈલ અને આઉટ-ઓફ-ધ-બોક્સ ફેશન માટે જાણીતો છે, પરંતુ તેની આ લેટેસ્ટ પોસ્ટ એ સાબિત કર્યું કે 'રોમાન્સનો બાદશાહ' પણ ક્યારેક સાચા પ્રેમની શોધમાં કવિ બની જાય છે.