મુંબઈ : બોલિવૂડ સુપરસ્ટાર શાહરૂખ ખાનના ચાહકો માટે એક મોટા સમાચાર સામે આવ્યા છે. 'પઠાણ' અને 'જવાન' જેવી બ્લોકબસ્ટર ફિલ્મો આપ્યા બાદ હવે કિંગ ખાન દક્ષિણ ભારતીય સિનેમાના સુપરસ્ટાર રજનીકાંત સાથે સ્ક્રીન શેર કરતા જોવા મળશે. મળતી માહિતી મુજબ, શાહરૂખ ખાન રજનીકાંતની મોસ્ટ અવેટેડ ફિલ્મ 'જેલર 2' માં એક પાવરફુલ પોલીસ અધિકારીની ભૂમિકા ભજવશે. આ સમાચાર વાયુવેગે પ્રસરતા જ સિનેમા જગતમાં ખળભળાટ મચી ગયો છે.
રજનીકાંત અને શાહરૂખની જબરદસ્ત જોડી
રિપોર્ટ્સ અનુસાર, 'જેલર 2' માં શાહરૂખ ખાનનો રોલ નાનો હશે પણ તે ખૂબ જ પ્રભાવશાળી હશે. 2023 માં આવેલી ફિલ્મ 'જવાન' માં શાહરૂખે પોલીસ ઓફિસર તરીકે જે સ્વેગ બતાવ્યો હતો, તે જોઈને ચાહકો તેના દિવાના થઈ ગયા હતા. હવે લગભગ ત્રણ વર્ષ બાદ ફરી એકવાર મોટા પડદા પર કિંગ ખાન ખાખી વર્દીમાં નજરે પડશે. રજનીકાંત અને શાહરૂખ જેવા બે દિગ્ગજ કલાકારોને એકસાથે જોવા એ ચાહકો માટે કોઈ મોટી ભેટથી કમ નથી.
ઓગસ્ટ 2026 માં રિલીઝ થવાની શક્યતા
'જેલર 2' ના રિલીઝ વિશે અત્યાર સુધી જે વિગતો મળી છે તે મુજબ, આ ફિલ્મ ઓગસ્ટ 2026 માં સિનેમાઘરોમાં દસ્તક આપી શકે છે. સાઉથ અને નોર્થ બંને બાજુના દર્શકો આ ફિલ્મની આતુરતાથી રાહ જોઈ રહ્યા છે. આ ફિલ્મમાં એક્શન અને ડ્રામાનું એવું મિશ્રણ જોવા મળશે જે ભારતીય સિનેમામાં ભાગ્યે જ જોવા મળે છે.
પુત્રી સુહાના સાથે પણ મચાવશે ધૂમ
બીજી તરફ, શાહરૂખ ખાન પોતાની આગામી ફિલ્મ 'કિંગ' માટે પણ સખત મહેનત કરી રહ્યા છે. આ ફિલ્મ 24 ડિસેમ્બર, 2026 ના રોજ રિલીઝ થવાની તૈયારીમાં છે. 'કિંગ' ફિલ્મની ખાસિયત એ છે કે તેમાં શાહરૂખ ખાન પહેલીવાર પોતાની પુત્રી સુહાના ખાન સાથે જોવા મળશે. આ ફિલ્મમાં અભિષેક બચ્ચન અને દીપિકા પાદુકોણ પણ મહત્વની ભૂમિકામાં હોવાથી મનોરંજનનો ડોઝ બમણો થવાનો છે.