મુંબઈ :  ટેલિવિઝન જગતના લોકપ્રિય અભિનેતા અને 'બિગ બોસ ૧૯' ના વિજેતા ગૌરવ ખન્નાએ તેની વિજયી રકમ બાબતે ચાલી રહેલી તમામ અફવાઓ પર પૂર્ણવિરામ મૂક્યું છે. તાજેતરમાં સોશિયલ મીડિયા પર એક વીડિયો વાયરલ થયો હતો, જેમાં ગૌરવે તેને ઈનામના ૫૦ લાખ રૂપિયા હજુ સુધી ન મળ્યા હોવાની વાત કરી હતી. આ વીડિયોએ સલમાન ખાનના શોના મેકર્સ અને ચેનલ સામે ગંભીર સવાલો ઉભા કર્યા હતા, પરંતુ હવે ગૌરવે પોતે સામે આવીને સત્ય જાહેર કર્યું છે.
જૂના વ્લોગના કારણે સર્જાયો છબરડો
ઝૂમ સાથેની વાતચીતમાં ગૌરવે સ્પષ્ટતા કરી કે જે ક્લિપ સોશિયલ મીડિયા પર વાયરલ થઈ રહી છે તે જૂની છે. તેણે જણાવ્યું કે, "આ વિવાદ બિનજરૂરી રીતે ઉછાળવામાં આવ્યો છે. એ વીડિયો મેં લગભગ ૪૦ દિવસ પહેલા રેકોર્ડ કર્યો હતો જ્યારે હું શિયાળામાં મારા વતન જઈ રહ્યો હતો. તે વ્લોગ મોડો રિલીઝ થયો હોવાથી લોકોને લાગ્યું કે મને હજુ સુધી પૈસા નથી મળ્યા, પણ વાસ્તવિકતા એ છે કે મને મારી સંપૂર્ણ ઇનામી રકમ મળી ગઈ છે."
વિવાદ ન વધારવા ચાહકોને કરી અપીલ
ગૌરવે વધુમાં સમજાવ્યું કે ટેલિવિઝન ઉદ્યોગમાં મોટી રકમની ચૂકવણી માટે અમુક નિશ્ચિત સમયરેખા હોય છે અને તેમાં થોડો વિલંબ થવો સામાન્ય બાબત છે. તેણે કોઈને પણ દોષ આપ્યા વિના સ્પષ્ટ કર્યું કે તેનો ઉદ્દેશ્ય કોઈ વિવાદ ઉભો કરવાનો નહોતો. તેણે ચાહકો અને નેટિઝન્સને વિનંતી કરી છે કે હવે આ બાબતનો ખોટો પ્રચાર કરવાનું ટાળે કારણ કે મેકર્સ સાથેના તેના સંબંધો ખૂબ જ સારા છે.
ગૌરવ ખન્નાની શાનદાર સફર
'અનુપમા' સીરિયલ દ્વારા દરેક ઘરના ફેવરિટ બનેલા ગૌરવ ખન્નાએ ડિસેમ્બર ૨૦૨૫ માં રમાયેલી 'બિગ બોસ ૧૯' ની ગ્રાન્ડ ફિનાલેમાં ઇતિહાસ રચ્યો હતો. તેણે ફરહાના ભટ્ટ અને અમલ મલિક જેવા મજબૂત સ્પર્ધકોને હરાવીને ટ્રોફી અને ૫૦ લાખ રૂપિયાનું ઈનામ જીત્યું હતું. હાલમાં તે પોતાની જીતનો આનંદ માણી રહ્યો છે અને તેના ચાહકો આ સ્પષ્ટતા બાદ રાહતનો શ્વાસ લઈ રહ્યા છે.