મુંબઈ, તા.17: જો તમે નબળા હૃદયના હોવ તો આ ફિલ્મ જોતા પહેલા બે વાર વિચારજો! વર્ષ 2020માં રિલીઝ થયેલી અને અત્યારે Netflix પર ટોપ ટ્રેન્ડિંગમાં આવેલી ફિલ્મ 'બુલબુલ' એ સોશિયલ મીડિયા અને OTT પ્લેટફોર્મ પર સનસનાટી મચાવી દીધી છે. માત્ર 1 કલાક અને 34 મિનિટની આ સસ્પેન્સ થ્રિલર તમને એક એવી દુનિયામાં લઈ જશે જ્યાં ડર અને સુંદરતા વચ્ચેની રેખા ભૂંસાઈ જાય છે.
બંગાળના ગામડાનું લોહિયાળ રહસ્ય
આ ફિલ્મની વાર્તા 19મી સદીના બંગાળ પ્રેસિડેન્સીના એક શાંત પણ ભેદી ગામમાં સેટ કરવામાં આવી છે. વાર્તા એક નાની છોકરી 'બુલબુલ'ની છે, જેના લગ્ન નાની ઉંમરે એક મધ્યમ વયના ધનિક જમીનદાર ઇન્દ્રનીલ (રાહુલ બોસ) સાથે કરી દેવામાં આવે છે. બુલબુલ તેના જેવડી જ ઉંમરના ઇન્દ્રનીલના નાના ભાઈ સત્યાની ખૂબ નજીક છે. સત્યા તેને વારંવાર ડાકણો અને ભૂતોની વાર્તાઓ સંભળાવતો હોય છે, પણ તેને ખબર નહોતી કે એક દિવસ આ વાર્તાઓ હકીકત બનીને સામે આવશે.
તૃપ્તિ ડિમરીનો ચોંકાવનારો અંદાજ
ફિલ્મમાં મુખ્ય ભૂમિકા ભજવનાર તૃપ્તિ ડિમરીએ પોતાના અભિનયથી બધાને સ્તબ્ધ કરી દીધા છે. ફિલ્મમાં જ્યારે ગામમાં એક પછી એક રહસ્યમય મોત થવા લાગે છે અને લોકો તેને 'ડાકણ'નું કામ ગણાવે છે, ત્યારે વાર્તામાં એવા વળાંક આવે છે જે તમને ખુરશી સાથે જકડી રાખશે. લાલ રંગના શેડ્સ અને ડરામણા જંગલોના દ્રશ્યો આ ફિલ્મને વધુ ભયાનક બનાવે છે.
શા માટે અત્યારે થઈ રહી છે ચર્ચા?
આ ફિલ્મ ભલે જૂની હોય, પણ તેની યુનિક વાર્તા અને સામાજિક સંદેશને કારણે તે ફરીથી દર્શકોમાં લોકપ્રિય થઈ રહી છે. બાળ લગ્ન, ઘરેલું હિંસા અને સ્ત્રી શક્તિ જેવા વિષયોને હોરરના માધ્યમથી જે રીતે રજૂ કરવામાં આવ્યા છે, તે કાબિલે તારીફ છે. જો તમે વીકએન્ડ પર કંઈક હટકે અને ડરામણું જોવા માંગતા હોવ, તો 'બુલબુલ' તમારી યાદીમાં ચોક્કસ હોવી જોઈએ.
તૃપ્તિ ડિમરી ઉપરાંત અવિનાશ તિવારી અને પાઓલી ડેમ જેવા કલાકારોએ પણ આ પિરિયડ હોરર ડ્રામામાં જીવ રેડ્યો છે.