મુંબઈ: સમગ્ર દેશમાં ઈદની ધામધૂમ પૂર્વક ઉજવણી કરવામાં આવી રહી છે, ત્યારે બોલીવુડના સિતારાઓ પણ આ તહેવારના રંગમાં રંગાયેલા જોવા મળ્યા હતા. હુમા કુરેશી, હિના ખાન, સારા અલી ખાન અને સોનાક્ષી સિંહા જેવી દિગ્ગજ અભિનેત્રીઓએ સોશિયલ મીડિયા પર તેમના ઈદ સેલિબ્રેશનના ફોટા શેર કર્યા છે. આ સુંદરીઓના ટ્રેડિશનલ પોશાક અને મિનિમલ મેકઅપ લુકે ચાહકોને મંત્રમુગ્ધ કરી દીધા છે.
હુમા અને હિનાનો 'રોયલ' અંદાજ
અભિનેત્રી હુમા કુરેશીએ વ્હાઈટ અને ગોલ્ડન એમ્બ્રોઈડરી વાળા કુર્તામાં પોતાનો રાજવી લુક શેર કર્યો હતો. ગ્લોસી મેકઅપ અને પિંક લિપસ્ટિકમાં તે અત્યંત સુંદર લાગતી હતી. બીજી તરફ, ફેશન આઈકોન હિના ખાને પોપટ લીલા (Parrot Green) રંગની પર્શિયન સલવાર અને શોર્ટ કુર્તી પહેરીને ટ્રેન્ડ સેટ કર્યો હતો. તેના હાથોમાં રચાયેલી મહેંદી અને કાનમાં પહેરેલી મોટી ચાંદબાલીએ તેના લુકમાં ચાર ચાંદ લગાવી દીધા હતા.
સાડીમાં સોનાક્ષી અને સિમ્પલ લુકમાં સારા
તાજેતરમાં લગ્નગ્રંથિથી જોડાયેલી સોનાક્ષી સિંહાએ તેના પતિ ઝહીર ઇકબાલ સાથે ઈદની ઉજવણી કરી હતી. સોનાક્ષીએ ગ્રે સિલ્ક સાડી અને બ્લુ બ્લાઉઝનું અનોખું કોમ્બિનેશન પસંદ કર્યું હતું, જેની સાથે કપાળ પરની નાની બિંદી તેની સુંદરતા વધારતી હતી. પટૌડી ખાનદાનની લાડલી સારા અલી ખાને તેની ફોઈ સોહા અલી ખાન સાથે સાદગીપૂર્ણ ઈદ ઉજવી હતી. સારા વ્હાઈટ કોટન કુર્તા અને ઓર્ગેન્ઝા દુપટ્ટામાં જોવા મળી હતી, જ્યારે સોહા ટ્રેડિશનલ વ્હાઈટ ઘરારામાં 'બેગમ' જેવી લાગતી હતી.
આમના શરીફનો પેસ્ટલ પિંક જાદુ
ટીવી અને ફિલ્મોની જાણીતી અભિનેત્રી આમના શરીફે પેસ્ટલ પિંક સૂટમાં પોતાની ઈદની તૈયારીઓ બતાવી હતી. સિલ્વર જ્વેલરી અને સ્મોકી આઈ મેકઅપ સાથે તેણે ચાહકોનું ધ્યાન ખેંચ્યું હતું. જો તમે પણ આગામી કોઈ પ્રસંગે ટ્રેડિશનલ છતાં મોર્ડન દેખાવા માંગતા હોવ, તો આ અભિનેત્રીઓના લુક ચોક્કસપણે પ્રેરણાદાયક સાબિત થઈ શકે છે.