અનિતા અડવાણી-રાજેશ ખન્નાના સંબંધને લગ્નનો દરજ્જો નહીં
વર્ષો જૂના વિવાદનો અંત : રાજેશ ખન્નાના લિવ-ઇન પાર્ટનર હોવાનો દાવો કરતી અનિતા અડવાણી દ્વારા દાખલ કરાયેલી અરજીને બોમ્બે હાઇકોર્ટે ફગાવીઃ અનિતાએ દલીલ કરી હતી કે રાજેશ ખન્નાએ તેના કપાળ પર સિદૂર લગાવ્યું હતું...
મુંબઈ,તા.૦૨: રાજેશ ખન્નાના લિવ-ઇન પાર્ટનર હોવાનો દાવો કરતી અનિતા અડવાણી દ્વારા દાખલ કરાયેલી અરજીને બોમ્બે હાઇકોર્ટે ફગાવી દીધી છે. અનિતાએ દલીલ કરી હતી કે રાજેશ ખન્નાએ તેના કપાળ પર સિદૂર લગાવ્યું હતું, જેનાથી તેને લગ્નનો દરજ્જો મળ્યો હતો. જો કે, કોર્ટે અનિતાની અપીલ ફગાવી દીધી હતી અને દિડોશી કોર્ટના ૨૦૧૭ના નિર્ણયને સમર્થન આપ્યું હતું.
સુપરસ્ટાર રાજેશ ખન્નાના મૃત્યુના વર્ષો પછી, તેમની આસપાસની કાનૂની લડાઈનો હવે અંત આવ્યો છે. બોમ્બે હાઇકોર્ટે અનિતા અડવાણી દ્વારા દાખલ કરાયેલી અરજી પર પોતાનો ચુકાદો આપ્યો છે. જસ્ટિસ શર્મિલા દેશમુખે અનિતા અડવાણીની અપીલ ફગાવી દીધી હતી. અનિતાએ દલીલ કરી હતી કે તે રાજેશ ખન્નાની લિવ-ઇન પાર્ટનર હતી, ૨૦૧૨ માં તેમના મૃત્યુ સુધી તેમની સાથે રહેતી હતી. તેણે એવો પણ દાવો કર્યો હતો કે રાજેશ ખન્નાએ ગુપ્ત રીતે તેના કપાળ પર સિંદૂર લગાવ્યું હતું, જેનાથી લગ્નનો દરજ્જો મળ્યો હતો.
અનિતા અડવાણી અને કાપડિયા પરિવાર ૨૦૧૨ થી મુકદ્દમામાં ફસાયેલા છે. અનિતાએ ડિમ્પલ, અક્ષય અને ટ્વિંકલ સામે બાંદ્રા મેજિસ્ટ્રેટ કોર્ટમાં ઘરેલુ હિસાનો ફોજદારી કેસ દાખલ કર્યો હતો. તેણે આરોપ લગાવ્યો હતો કે રાજેશ ખન્નાના મૃત્યુ પછી તેને તેમના બંગલા, આશીર્વાદમાંથી કાઢી મૂકવામાં આવ્યો હતો.
૨૦૧૫ માં, બોમ્બે હાઈકોર્ટે આ કેસમાં ડિમ્પલ કાપડિયા, ટ્વિંકલ અને અક્ષય સામે ઘરેલુ હિસાની કાર્યવાહીને ફગાવી દીધી હતી. કોર્ટે ચુકાદો આપ્યો હતો કે અનિતા અને રાજેશ ખન્ના પરિણીત નહોતા, અને તેથી, ત્રણેય સામે ઘરેલુ હિસાની કાર્યવાહી શરૂ કરી શકાતી નથી.
રાજેશ ખન્નાની કાયદેસર પત્ની ડિમ્પલ કાપડિયા, તેમની પુત્રી ટ્વિંકલ ખન્ના અને તેમના પતિ અક્ષય કુમાર દ્વારા અનિતાના દાવાઓનો વિરોધ કરવામાં આવ્યો હતો. કોર્ટના નિર્ણયથી કાપડિયા પરિવારને રાહત મળી છે.
અનિતા અડવાણી એક અભિનેત્રી છે. તે દાસી, આઓ પ્યાર કરેં અને સાઝીશ જેવી ફિલ્મોમાં જોવા મળી છે. તેની ફિલ્મ કારકિર્દી ખૂબ લાંબી નહોતી. ૨૦૧૨માં રાજેશ ખન્નાના અવસાન પછી તે ચર્ચામાં આવી હતી. તેણે દાવો કર્યો હતો કે તે તેમની ખૂબ નજીક હતી. અનિતાએ બિગ બોસમાં ભાગ લીધો હતો, જ્યાં તેણે રાજેશ ખન્ના સાથેના તેના સંબંધો વિશે ખુલ્લેઆમ વાત કરી હતી.
ડિમ્પલ ૧૫ વર્ષની હતી ત્યારે રાજેશને મળી હતી. તે સમયે રાજેશ ખન્ના સુપરસ્ટાર હતા, અને ડિમ્પલ તેમની ચાહક હતી. બંનેએ માર્ચ ૧૯૭૩માં લગ્ન કર્યા હતા. તે સમયે ડિમ્પલ ૧૬ વર્ષની હતી અને રાજેશ ખન્ના ૩૧ વર્ષના હતા.