મુંબઈ : ભારતીય સિનેમાના ઈતિહાસમાં નવો ઈતિહાસ રચનાર ફિલ્મ 'ધુરંધર'ના ડિરેક્ટર આદિત્ય ધર હાલમાં પોતાની ટીમના સભ્યોની પ્રશંસા કરવામાં કોઈ કસર છોડી રહ્યા નથી. તાજેતરમાં તેમણે ફિલ્મના કાસ્ટિંગ ડિરેક્ટર મુકેશ છાબડા માટે એક અત્યંત સુંદર નોંધ લખી હતી, જેના જવાબમાં મુકેશ છાબડાએ પણ પોતાની લાગણીઓ ઠાલવતા એક ભાવુક પોસ્ટ શેર કરી છે. છાબડાએ લખ્યું કે, "આ પોસ્ટ વાંચીને હું ખૂબ જ ભાવુક થઈ ગયો છું, તમારી પ્રશંસા માટે આભાર કહેવા મારી પાસે શબ્દો નથી."
સેટ પરના પ્રેમ અને આદરની વાત
મુકેશ છાબડાએ પોતાની પોસ્ટમાં આદિત્ય ધરના સ્વભાવની પ્રશંસા કરતા જણાવ્યું કે, બોલિવૂડમાં એવા લોકો બહુ ઓછા છે જે સેટ પરના દરેક વિભાગના વડા (HOD) અને નાનામાં નાના કર્મચારીને આટલો આદર અને પ્રેમ આપે છે. તેમણે ઉમેર્યું કે, તેમને આદિત્ય પર ગર્વ છે અને આ ફિલ્મ માટે કામ કરવાનો અનુભવ તેમના માટે કાયમ યાદગાર રહેશે.
દોઢ વર્ષની મહેનત અને શાનદાર કાસ્ટિંગ
'ધુરંધર' ફ્રેન્ચાઈઝીમાં અક્ષય ખન્ના, સારા અર્જુન અને રાકેશ બેદી જેવા કલાકારોનું સચોટ કાસ્ટિંગ મુકેશ છાબડાની મોટી સફળતા માનવામાં આવે છે. છાબડાએ એક મુલાકાતમાં જણાવ્યું હતું કે, આ ફિલ્મ માટે પરફેક્ટ કલાકારો શોધવામાં તેમને લગભગ દોઢ વર્ષનો સમય લાગ્યો હતો. આ માટે તેમની ટીમે બેંગકોક, દિલ્હી, કાશ્મીર અને મુંબઈના ખૂણેખૂણા ફેંદી નાખ્યા હતા. આદિત્ય ધરની વિઝનરી વાર્તાએ તેમને આટલી મહેનત કરવા માટે પ્રોત્સાહિત કર્યા હતા.
બોક્સ ઓફિસ પર મચાવી ધૂમ
'ધુરંધર 2' એ ભારતીય બોક્સ ઓફિસ પર કમાણીના તમામ રેકોર્ડ તોડી નાખ્યા છે. અત્યાર સુધીમાં આ ફિલ્મે ભારતમાં કુલ રૂ. 1,033.37 કરોડની અધધ કમાણી કરીને બ્લોકબસ્ટરનો દરજ્જો મેળવ્યો છે. ફિલ્મના પહેલા ભાગની સફળતા બાદ બીજા ભાગે તોફાની કલેક્શન કરીને બોલિવૂડમાં આદિત્ય ધર અને તેમની ટીમનું કદ અનેકગણું વધારી દીધું છે.
ફિલ્મ જગતના આ બે દિગ્ગજો વચ્ચેની આ જુગલબંદી અને પરસ્પર આદર દર્શાવે છે કે જ્યારે એક સારી ટીમ એકજૂટ થઈને કામ કરે છે, ત્યારે પરિણામ હંમેશા ઐતિહાસિક જ હોય છે.