રાજા શિવાજીથી નાગઝિલ્લા અને માતૃભૂમિ સુધીઃમોટી ફિલ્મો વચ્ચે ટક્કર જોવા મળશે
૧ મેથી લઈને ઇન્ડિપેન્ડન્સ ડે ૧૫ ઓગસ્ટ સુધી અનેક ફિલ્મો એકબીજાને ટક્કર આપતી જોવા મળશે
મુંબઈ,તા.૧૧: ૨૦૨૬નું બોલિવૂડ રિલીઝ કેલેન્ડર ખૂબ જ વ્યસ્ત અને રસપ્રદ છે, જેમાં મોટી ફિલ્મો વચ્ચે ટક્કર જોવા મળશે. આ કેલેન્ડર એટલું વ્યસ્ત છે કે ઘણા ફિલ્મ મેકર્સ ટક્કર ટાળવા માટે પોતાની ફિલ્મ આગળ-પાછળ કરતાં અન્ય ફિલ્મ સાથે ટક્કરની સ્થિતિમાં આવી રહ્યાં છે. મે ૧થી લઈને ઇન્ડિપેન્ડન્સ ડે - ૧૫ ઓગસ્ટના અઠવાડિયા સુધી અનેક ફિલ્મો એકબીજાને ટક્કર આપતી જોવા મળશે.
રાજા શિવાજી (૧ મે) રિતેશ દેશમુખની મહત્ત્વાકાંક્ષી ફિલ્મ ‘રાજા શિવાજી'માં તે છત્રપતિ શિવાજી મહારાજનો રોલ ભજવી રહ્યો છે અને સાથે ડિરેક્ટર તરીકે પણ કામ કરી રહ્યો છે. ફિલ્મમાં જેનેલિયા દેશમુખ, અભિષેક બચ્ચન અને વિદ્યાબાલન પણ છે. આ ફિલ્મ સાથે જુનૈદ ખાનની ‘એક દિન' રિલીઝ થશે, જેમાં સાઈ પલ્લવી બોલિવૂડમાં ડેબ્યુ કરશે.
ચાંદ મેરા દિલ બંદર તેરા યાર હૂં મેં (૨૨ મે) આ ત્રિપાંખિયા ટક્કરમાં અનન્યા પાંડે અને લક્ષ્યની રોમેન્ટિક ફિલ્મ ‘ચાંદ મેરા દિલ'નો મુકાબલો અનુરાગ કશ્યપની ‘બંદર' સાથે થશે, જે આંતરરાષ્ટ્રીય ફિલ્મ ફેસ્ટિવલમાં પ્રશંસા મેળવી ચૂકી છે. તેની સાથે જ અમન ઇન્દ્ર કુમારની ડેબ્યુ ફિલ્મ ‘તેરા યાર હૂં મેં' પણ રિલીઝ થશે, જેમાં આકાંક્ષા શર્મા છે અને તેને મિલાપ મિલન ઝવેરી ડિરેક્ટ કરે છે.
નાગઝિલ્લા માતૃભૂમિ (ઇન્ડિપેન્ડન્સ ડે) સલમાન ખાનની ‘માતૃભૂમિઃ મે વોર રેસ્ટ ઇન પીસ' ઇન્ડિપેન્ડન્સ ડે આસપાસ રિલીઝ થવાની ચર્ચા છે. જો એવું થાય, તો તેનો મુકાબલો કાર્તિક આર્યનની સુપર નેચરલ કોમેડી ‘નાગઝિલ્લા' સાથે થશે.
ખોસલા કા ઘોસલા ૨ વીવાન (૨૮ ઑગસ્ટ) ૨૦૦૬ની નેશનલ એવોર્ડ વિજેતા ફિલ્મની સિક્વલ ‘ખોસલા કા ઘોસલા ૨'માં અનુપમ ખેર, બોમન ઇરાની, રણવીર શૌરી, તારા શર્મા સલુજા અને પરવિન ડબાસ ફરી જોવા મળશે, સાથે રવિ કિશન નવી એન્ટ્રી છે. આ ફિલ્મનો મુકાબલો સિદ્ધાર્થ મલ્હોત્રા અને તમન્ના ભાટિયાની ‘વીવાનઃ ફોર્સ ઓફ ધ ફોરેસ્ટ' સાથે થશે. ૨૦૨૬માં બોક્સ ઓફિસ પર આવી મોટી ટક્કરો દર્શકો માટે ખૂબ જ રસપ્રદ સાબિત થશે, કારણ કે મોટા સ્ટાર્સ અને અલગ-અલગ જોનરની ફિલ્મો વચ્ચે જોરદાર સ્પર્ધા જોવા મળશે.
મૈં વાપસ આઉંગા હૈ જવાની તો ઇશ્ક હોના હૈ (૧૨ જૂન) ઇમ્તિયાઝ અલીની રોમેન્ટિક ફિલ્મ ‘મૈં વાપસ આઉંગા'માં વેદાંગ રૈના, શર્વરી, દિલજીત દોસાંઝ અને નસીરુદ્દીન શાહ છે. આ ફિલ્મની ટક્કર વરુણ ધવન, મૃણાલ ઠાકુર અને પૂજા હેગડેની ‘હૈ જવાની તો ઇશ્ક હોના હૈ' સાથે થશે, જે ડેવિડ ધવનની કમબેક ફિલ્મ છે.