મુંબઈ: તા.૦૬ OTT પ્લેટફોર્મ નેટફ્લિક્સ (Netflix) પર દર અઠવાડિયે નવી ફિલ્મો અને વેબ સિરીઝ રિલીઝ થતી હોય છે, પરંતુ કેટલીક ફિલ્મો એવી હોય છે જે કોઈ મોટા ગાજાવાજા વગર આવે છે અને સીધી લોકોના દિલમાં ઉતરી જાય છે. આવી જ એક તેલુગુ સ્પોર્ટ્સ ડ્રામા ફિલ્મ 'બાઈકર' (Biker) અત્યારે નેટફ્લિક્સ પર ધૂમ મચાવી રહી છે. ૨ કલાક અને ૩૯ મિનિટની આ ફિલ્મ અત્યારે ટોપ ટ્રેન્ડિંગ લિસ્ટમાં ત્રીજા નંબરે પહોંચી ગઈ છે.
શર્વાનંદના અભિનય અને વાર્તાએ જીત્યા દિલ
સાઉથ સિનેમાના જાણીતા અભિનેતા શર્વાનંદ સ્ટારર આ ફિલ્મમાં બાઈક રેસિંગ અને જીવનના સંઘર્ષની વાર્તાને સુંદર રીતે વણી લેવામાં આવી છે. સિનેમાઘરોમાં વ્યવસાયિક રીતે સફળ થયા બાદ હવે ઓનલાઈન સ્ટ્રીમિંગમાં પણ આ મૂવીએ પોતાની પકડ મજબૂત કરી લીધી છે. નેટફ્લિક્સના ટોપ-૫ મૂવીઝ લિસ્ટમાં એન્ટ્રી મારીને આ ફિલ્મે સાબિત કરી દીધું છે કે સાઉથના કન્ટેન્ટની બોલબાલા અત્યારે પૂરા દેશમાં છે.
રેટિંગમાં પણ મારી બાજી
કોઈપણ ફિલ્મ કેટલી સારી છે તે જાણવા માટે લોકો ઘણીવાર IMDb રેટિંગ ચેક કરતા હોય છે. 'બાઈકર' ફિલ્મને IMDb પર ૧૦ માંથી ૬.૬ નું શાનદાર રેટિંગ મળ્યું છે, જે એક સ્પોર્ટ્સ ડ્રામા ફિલ્મ માટે ખૂબ જ સારું કહી શકાય. ફિલ્મના ડાયરેક્શન અને કલાકારોના પરફોર્મન્સના સોશિયલ મીડિયા પર પણ વખાણ થઈ રહ્યા છે.
હિન્દીમાં પણ છે ઉપલબ્ધ
જો તમે સાઉથની ભાષાઓથી પરિચિત નથી, તો ચિંતા કરવાની જરૂર નથી. નેટફ્લિક્સ પર આ ફિલ્મ તેલુગુ, તમિલ, કન્નડ અને મલયાલમ ઉપરાંત હિન્દી ભાષામાં પણ ઉપલબ્ધ છે. વીકેન્ડમાં કંઈક નવું અને થ્રિલિંગ જોવાનું વિચારી રહ્યા હોવ, તો આ સ્પોર્ટ્સ ડ્રામા એક શ્રેષ્ઠ વિકલ્પ બની શકે છે.