મુંબઈ: બોલિવૂડથી લઈને સાઉથ સિનેમા સુધી અત્યારે પડદા પર ગુનેગારો, દાણચોરો અને હિંસક માફિયા ડોન જેવા ‘એન્ટી-હીરો’ પાત્રોનો રાફડો ફાટ્યો છે. સત્તા અને પાવર મેળવવા માટે લોહીની નદીઓ વહાવતા નાયકો વચ્ચે હવે માટીની સુગંધ અને સામાન્ય જનતાના આક્રોશ સાથે જોડાયેલા એક અસલી લોકનાયકની વાપસી થઈ રહી છે. સાઉથના સુપરસ્ટાર રામ ચરણ અને જાણીતા દિગ્દર્શક બુચ્ચી બાબુની આગામી મોસ્ટ અવેટેડ ફિલ્મ 'પેડ્ડી' (Peddi)નું ધમાકેદાર ટ્રેલર રિલીઝ થતાં જ સોશિયલ મીડિયા પર ધૂમ મચાવી રહ્યું છે. આ ફિલ્મમાં રામ ચરણનો એવો દેશી અને રો-લુક (Raw Look) જોવા મળી રહ્યો છે, જે દર્શકોએ અગાઉ ક્યારેય નથી જોયો.
ફિલ્મના ટ્રેલર પરથી સ્પષ્ટ ઝાંખી થાય છે કે રામ ચરણ આ વખતે કોઈ ક્રિમિનલ સામ્રાજ્યના બાદશાહ કે અજેય સુપરહ્યુમન તરીકે પડદા પર નથી આવી રહ્યા. તેઓ એક એવા સામાન્ય નાયકની ભૂમિકા ભજવી રહ્યા છે, જેનો ગુસ્સો કોઈ વ્યક્તિગત બદલો લેવા માટે નથી, પરંતુ તેની આસપાસના ગરીબ અને દબાયેલા મજૂર વર્ગના વર્ષો જૂના શોષણનો આક્રોશ છે. આ વાર્તા એક દૈનિક શ્રમજીવી મજૂરના જીવન પરથી પ્રેરિત હોવાનું મનાય છે, જે કાલ્પનિક વાર્તાઓથી તદ્દન અલગ અને જમીની વાસ્તવિકતાની ખૂબ નજીક છે. તે પોતાની માટી, પોતાના હક અને પોતાના વિસ્તારના લોકોની આબરૂ બચાવવા માટે સિસ્ટમ સામે એકલો ઊભો થાય છે.
રોમાંચક સંઘર્ષ અને દેશી રમતોનો રોમાંચ
ફિલ્મમાં બતાવવામાં આવેલી પરંપરાગત રમતો જેવી કે કુસ્તી, દોડ અને ક્રિકેટ માત્ર ટાઈમપાસ કે મનોરંજનના સાધનો નથી, પણ અન્યાય સામે લડવા માટેના ભીષણ યુદ્ધના મેદાન સમાન છે. માટીમાં લોહી-લુહાણ થતા ખેલાડીઓ, ગામલોકોની ચીસો અને વાતાવરણનો આ માહોલ દર્શકોની રૂંવાટી ઊભી કરી દે તેવો હૃદયસ્પર્શી છે.
રામ ચરણે અગાઉ 'મગધીરા', 'ધ્રુવા' અને ઓસ્કાર વિજેતા 'RRR' જેવી ફિલ્મોમાં અત્યંત ભવ્ય, કડક અને શક્તિશાળી પાત્રો ભજવીને વૈશ્વિક સ્તરે પ્રશંસા મેળવી છે. પરંતુ 'પેડ્ડી'માં તેમનો લુક અને અંદાજ વધુ ભારે, ગંભીર અને કરડાકીભર્યો છે. અહીં તેઓ કોઈ ચમકતા-દમકતા ગ્લેમરસ સ્ટાર જેવા નહીં, પણ પરસેવે રેબઝેબ અને ભીડનો જ એક હિસ્સો બનીને અન્યાય સામે લડતા સામાન્ય માણસ જેવા ભાસે છે.
ડાયરેક્ટર બુચ્ચી બાબુ હંમેશા સમાજની ઊંચ-નીચ અને વાસ્તવિક સંવેદનશીલ મુદ્દાઓને રૂપેરી પડદે લાવવા માટે જાણીતા છે. 'પેડ્ડી'માં તેઓ રમતગમતની સાથે ગ્રામ્ય રાજનીતિ અને સામાજિક ઓળખને ખૂબ જ મોટા સ્કેલ પર વણી રહ્યા છે. આજના નકારાત્મક હીરોના દોરમાં, પોતાની માટી માટે લડનારા એક સાચા જનતાના હીરોને જોવા માટે સિનેપ્રેમીઓ આતુર બન્યા છે.