મુંબઈ: બોલિવૂડના દિગ્ગજ નિર્માતા ઇમ્તિયાઝ અલીની આગામી ફિલ્મ ‘મેં વાપસ આઉંગા’ હાલમાં સિનેમાપ્રેમીઓમાં ખૂબ ચર્ચાનો વિષય બની છે. દિલજીત દોસાંઝ, શર્વરી અને વેદાંગ રૈના જેવા કલાકારોથી સજ્જ આ ફિલ્મ વિભાજન પૂર્વેના પૃષ્ઠભૂમિ પર આધારિત છે. ફિલ્મનું ટીઝર અને ગીતો જોતા ચાહકો તેને ક્રોસ-બોર્ડર લવ સ્ટોરી માની રહ્યા હતા, પરંતુ ઇમ્તિયાઝ અલીએ એક ખાસ મુલાકાતમાં આ અટકળો પર પૂર્ણવિરામ મૂકતા કહ્યું કે, "આ કોઈ ક્રોસ-બોર્ડર સ્ટોરી નથી. આ અવિભાજિત ભારતની વાર્તા છે, કારણ કે તે સમયે કોઈ સરહદ જ નહોતી."
"કોઈપણ તીર ગમે ત્યાંથી આવી શકે છે" - વિવાદો પર ઇમ્તિયાઝનું વલણ
આજના સોશિયલ મીડિયાના યુગમાં ફિલ્મો પર ટ્રોલિંગ કે વિવાદો થવા સામાન્ય છે. આ અંગે વાત કરતા ઇમ્તિયાઝે પોતાની સુપરહિટ ફિલ્મ ‘જબ વી મેટ’ નો એક જૂનો કિસ્સો વાગોળ્યો. તેમણે જણાવ્યું કે, રતલામમાં કોઈએ ફરિયાદ કરતા તેમની સામે બિન-જામીનપાત્ર વોરંટ નીકળ્યું હતું અને તેઓ જેલ પણ જઈ શક્યા હોત. તેમણે કહ્યું, "વાર્તાનો નૈતિક અર્થ એ છે કે કોઈપણ તીર કોઈપણ બાજુથી આવી શકે છે, પણ તમે તેના કારણે રસ્તા પર ચાલવાનું (ફિલ્મો બનાવવાનું) બંધ કરી શકતા નથી. મને ખ્યાલ છે કે ફિલ્મ નિર્માતા તરીકે મારી પાસે શક્તિ છે અને તેની સાથે જવાબદારીની ભાવના પણ આવે છે."
"એજન્ડા વગરની, માત્ર એક વ્યક્તિગત વાર્તા"
ઇમ્તિયાઝ અલીએ સ્પષ્ટતા કરી કે જો કોઈ ફિલ્મમાં સ્પષ્ટ એજન્ડા હોય તો તે વાર્તાને નબળી પાડે છે. તેમણે ‘અમર સિંહ ચમકીલા’ જેવી વિવાદાસ્પદ ફિલ્મના સર્જનનો ઉલ્લેખ કરતા કહ્યું કે, તેઓ હંમેશા એ વાતનું ધ્યાન રાખે છે કે કોઈની લાગણીઓને ઠેસ ન પહોંચે. ‘મેં વાપસ આઉંગા’ વિશે વાત કરતા તેમણે ખાતરી આપી કે, "આ ફિલ્મ કોઈના પક્ષમાં કે વિરુદ્ધમાં નથી, તે એક વ્યક્તિની ખૂબ જ અંગત વાર્તા છે. મારો હેતુ સ્પષ્ટ છે અને બાકી બધું ભગવાન પર છોડ્યું છે."
તમારી જાણકારી માટે, ‘મેં વાપસ આઉંગા’ આગામી 12 જૂન, 2026 ના રોજ મોટા પડદા પર રિલીઝ થવા જઈ રહી છે. ઇમ્તિયાઝ અલીની અનોખી વાર્તા કહેવાની શૈલી જોવા માટે દર્શકોમાં ભારે ઉત્સુકતા જોવા મળી રહી છે.