નવી દિલ્હી:  વેકેશનના માહોલ વચ્ચે દેશના સૌથી લોકપ્રિય ઓટીટી પ્લેટફોર્મ નેટફ્લિક્સે પોતાના યુઝર્સને રોમાંચથી ભરી દેવા માટે કમર કસી લીધી છે. આગામી ૮ જૂન થી ૧૪ જૂન દરમિયાન પ્લેટફોર્મ પર એક-બે નહીં પરંતુ પૂરી ૧૧ શાનદાર ફિલ્મો અને વેબ સિરીઝનો મેળો ભરાવા જઈ રહ્યો છે. આ અઠવાડિયે દર્શકોને ઘરબેઠા જ સસ્પેન્સ, મિસ્ટ્રી, કોર્ટરૂમ ડ્રામા અને ખતરનાક ક્રાઈમ થ્રિલર જોવા મળશે, જે ડિજિટલ સ્ક્રીન સામેથી હટવા નહીં દે. મનોરંજનના આ મહાડોઝમાં બાળકોના પ્રભાવશાળી શો 'સેસેમ સ્ટ્રીટ' ના ઈતિહાસથી લઈને કૉમેડી ડ્રામા 'શ્રીલ' નો પણ સમાવેશ થાય છે, જે દર્શકોને એક સંપૂર્ણ અને વૈવિધ્યસભર મનોરંજનનો અનુભવ કરાવશે.

રમતગમત અને ક્રાઈમ શૈલીના શોખીનો માટે આ અઠવાડિયું ખૂબ જ ખાસ રહેવાનું છે. આગામી ૯ જૂને રિલીઝ થઈ રહેલી 'નોર્વે: ધ ડાર્ક હોર્સ' સ્પોર્ટ્સ ડ્રામાના ચાહકો માટે ૨૬ વર્ષ પછી વર્લ્ડ કપમાં વાપસી કરનારી ફૂટબોલ ટીમની ઈમોશનલ સફર લાવશે. જ્યારે ૧૦ જૂને ક્રાઈમ ડ્રામાના શોખીનો માટે 'કલર્સ ઓફ એવિલ: બ્લેક' રિલીઝ થશે, જે વર્ષ ૨૦૨૪ની સુપરહિટ ફિલ્મ 'કલર્સ ઓફ એવિલ: રેડ' ની સિક્વલ છે અને એક શાંત શહેરમાં ગુમ થયેલા બાળકના રહસ્ય પરથી પડદો ઉઠાવશે. આ જ દિવસે કૌટુંબિક લાગણીઓથી ભરપૂર 'માય ફેમિલી' ની બીજી સીઝન અને ૧ મિલિયન ડોલરના ઈનામવાળી રોમાંચક સર્વાઈવલ રિયાલિટી સીરીઝ 'આઉટલાસ્ટ: ધ જંગલ' પણ ડિજિટલ પ્લેટફોર્મ પર ધમાકેદાર એન્ટ્રી કરવા માટે તૈયાર છે.

અઠવાડિયાના ઉત્તરાર્ધમાં એટલે કે ૧૧ થી ૧૩ જૂન દરમિયાન પણ મનોરંજનનો આ સિલસિલો અટકશે નહીં. ૧૧ જૂને કોર્ટરૂમ ક્રાઇમ ડ્રામા 'ધ એવિલ લોયર' રિલીઝ થશે, જે કાયદાની આંટીઘૂંટીમાં ફસાયેલા નિર્દોષ યુવકની સસ્પેન્સભરી વાર્તા રજૂ કરે છે. તે જ દિવસે ત્રણ મિત્રોની રોમેન્ટિક ડ્રામા સીરીઝ 'સ્વીટ મેગ્નોલિયાસ' અને દક્ષિણ કોરિયન વેબટૂન પર આધારિત લાઈવ-એક્શન સીરીઝ 'વાયરલ હિટ' ધૂમ મચાવશે. ત્યારબાદ, ૧૨ જૂને ઈસ્ટ ટેક્સાસના બેકગ્રાઉન્ડ વાળી સસ્પેન્સથી ભરપૂર ક્રાઈમ ફિલ્મ 'માતૃત્વ વૃત્તિ' અને ૧૩ જૂને ૨૦૦૮ની રિયલ ડોક્યુમેન્ટરી પર આધારિત મ્યુઝિકલ ક્રાઈમ ડ્રામા 'સોંગ સુંગ બ્લુ' રજૂ કરવામાં આવશે, જે દર્શકોના વીકેન્ડને વધુ મજેદાર બનાવશે.