નવી દિલ્હી, તા.૦૨: સિનેમાપ્રેમીઓ માટે અઠવાડિયાનો સૌથી ફેવરિટ એવો શુક્રવારનો દિવસ ફરી એકવાર મનોરંજનનો જોરદાર ખજાનો લઈને આવી રહ્યો છે. જૂન મહિનામાં 'હાઉસ ઓફ ધ ડ્રેગન' અને 'ગુલ્લક સીઝન ૫' જેવી સુપરહિટ સિરીઝ માણ્યા બાદ, હવે જુલાઈ મહિનાનો આ પહેલો શુક્રવાર (૩ જુલાઈ) દર્શકો માટે ડબલ ધમાકો સાબિત થવાનો છે. થિયેટરોથી લઈને OTT પ્લેટફોર્મ્સ પર એકસાથે ૮ મોટી ફિલ્મો અને વેબ સિરીઝ રિલીઝ થવા જઈ રહી છે, જે તમારો આખો વિકેન્ડ રોમાંચથી ભરી દેશે. તો ચાલો મોડું કર્યા વગર જોઈ લઈએ આ શુક્રવારે ધૂમ મચાવવા આવી રહેલી ફિલ્મો અને સિરીઝનું આખું લિસ્ટ:
૧. આલ્ફા (Alpha) – થિયેટર રિલીઝ
જુલાઈ મહિનાની સૌથી મોટી અને મોસ્ટ અવેટેડ ફિલ્મોમાં આલિયા ભટ્ટ, શરવરી વાઘ અને બોબી દેઓલ સ્ટારર 'આલ્ફા' મોખરે છે. યશરાજ બેનરની આ હાઈ-બજેટ સ્પાય થ્રિલર ફિલ્મ માટે ચાહકોમાં જબરદસ્ત ક્રેઝ છે. ફિલ્મના પ્રમોશનમાં આલિયા અને શર્વરીએ કોઈ કસર છોડી નથી. એડવાન્સ બુકિંગમાં જ આ ફિલ્મે અત્યાર સુધીમાં ૧.૫ કરોડથી વધુની કમાણી કરી લીધી છે. હવે આ શુક્રવારે થિયેટરોમાં આ સ્પાય યુનિવર્સ કેવો કમાલ કરે છે તે જોવું રસપ્રદ રહેશે.
૨. પ્રીતમ એન્ડ પેડ્રો (Pritam & Pedro) – જીયો હોટસ્ટાર
બોલિવૂડના દિગ્ગજ ડાયરેક્ટર રાજકુમાર હિરાની આ સિરીઝ સાથે ઓટીટી (OTT) ની દુનિયામાં પોતાનું ભવ્ય ડેબ્યુ કરવા જઈ રહ્યાં છે. આ મિસ્ટ્રી થ્રિલર સિરીઝની વાર્તા ગોવાના એક એવા પોલીસ ઓફિસર 'પેડ્રો'ની આસપાસ ફરે છે, જેને સાયબર ક્રાઈમ વિશે બહુ ઓછી માહિતી છે. એક રીઢા હેકર માર્ટિનને પકડવા માટે તે માસ્ટરમાઇન્ડ 'પ્રીતમ'ની મદદ લે છે. આ સિરીઝથી રાજકુમાર હિરાનીના પુત્ર વીર હિરાની પણ એક્ટિંગ કરિયરની શરૂઆત કરી રહ્યો છે.
૩. બેબી ડુ ડાઇ ડુ (Baby Do Die Do) – થિયેટર રિલીઝ
OTT પ્લેટફોર્મ પર 'મહારાણી' બનીને રાજ કરનાર હુમા કુરેશી હવે એક તદ્દન અલગ અંદાજમાં મોટા પડદા પર ધમાકો કરવા તૈયાર છે. આ એક હાઈ-ઓક્ટેન એક્શન ક્રાઈમ થ્રિલર ફિલ્મ છે, જેમાં હુમા કુરેશી એક મૂક-બધિર (જે સાંભળી કે બોલી શકતી નથી) મહિલા 'બેબી'નું પાત્ર ભજવી રહી છે, જે વાસ્તવમાં એક પ્રોફેશનલ કોન્ટ્રાક્ટ કિલર છે. હુમાનો આ ખતરનાક એક્શન અવતાર દર્શકોને ચોંકાવી દેશે.
૪. રાવ બહાદુર (Rao Bahadur) – થિયેટર રિલીઝ
દક્ષિણ ભારતીય સિનેમાના સુપરસ્ટાર મહેશ બાબુના પ્રોડક્શન હાઉસ હેઠળ બનેલી સાયકોલોજિકલ થ્રિલર ફિલ્મ 'રાવ બહાદુર' પણ આ શુક્રવારે થિયેટરોમાં રિલીઝ થઈ રહી છે. બોક્સ ઓફિસ પર આ સાઉથ ફિલ્મની સીધી ટક્કર આલિયા ભટ્ટની 'આલ્ફા' સાથે થવાની છે, જે થિયેટર માલિકો માટે જોરદાર કમાણીની તક લાવશે.
૫. મોલીવુડ ટાઇમ્સ (Mollywood Times) – જીયો હોટસ્ટાર
મલયાલમ ભાષામાં બનેલી આ એક અનોખી સાયકોલોજિકલ ડાર્ક કોમેડી ફિલ્મ છે. આ વાર્તા વિનીત માધવન નામના પાત્રની આસપાસ ફરે છે, જે મલયાલમ સિનેમાનો સૌથી મોટો હોરર ડિરેક્ટર બનવા માંગે છે. પરંતુ આ ઈન્ડસ્ટ્રીના રાજકારણમાં ફસાતા તેનું જીવન એક અત્યંત ખતરનાક વળાંક લે છે.
૬. મુથાસી (Muthassi) – ZEE5
કેરળ અને કર્ણાટકની બોર્ડર પર આવેલા એક રહસ્યમય ગામની પૃષ્ઠભૂમિ પર આધારિત આ એક સુપરનેચરલ હોરર થ્રિલર સિરીઝ છે. વાર્તાની મુખ્ય પાત્ર લીલાના જીવનમાં ત્યારે ભૂકંપ આવે છે જ્યારે તે તેના પતિના જૂના ઘરે રહેવા જાય છે. ત્યાં તેને એક ભયાનક શ્રાપ અને પૂર્વજોના રહસ્યોનો સામનો કરવો પડે છે.
૭. કરક્કમ (Karakkam) – સોની લિવ
મલયાલમ સિનેમાની આ પહેલી મ્યુઝિકલ હોરર કોમેડી ફિલ્મ છે, જે 'સોની લિવ' પર સ્ટ્રીમ થશે. આ વાર્તા બે યુવાન મિત્રોની છે, જેઓ માત્ર એક મજાકના ચક્કરમાં મોટી મુશ્કેલીમાં ફસાઈ જાય છે અને તેમનો સામનો ભૂતિયા શક્તિઓ સાથે થાય છે. ડર અને હાસ્યનો આ સમન્વય દર્શકોને ખૂબ ગમશે.
૮. નાગબંધમ: ધ સિક્રેટ ટ્રેઝર (Nagabandham) – થિયેટર રિલીઝ
અભિષેક નામા દ્વારા નિર્મિત આ એક ભવ્ય પૌરાણિક એડવેન્ચર (Mythological Adventure) ફિલ્મ છે. પ્રાચીન રહસ્યો અને ખજાનાની શોધ પર બનેલી આ ફિલ્મમાં કૃતિ શેટ્ટી, નાભા નતેશ અને ઐશ્વર્યા રાજેશ મુખ્ય ભૂમિકામાં જોવા મળશે. જો તમને પૌરાણિક કથાઓ અને સસ્પેન્સ ગમતું હોય, તો આ ફિલ્મ થિયેટરમાં જોવાનો લહાવો ચૂકવા જેવો નથી.