મુંબઈ : "પરિણીતા," "કહાની," "ધ ડર્ટી પિક્ચર," અને "ભૂલ ભુલૈયા" જેવી સુપરહિટ ફિલ્મોમાં પોતાના દમદાર અભિનયથી દર્શકોના દિલ જીતનારી બોલિવૂડની ટેલેન્ટેડ અભિનેત્રી વિદ્યા બાલન આજે જે સ્થાન પર છે ત્યાં પહોંચવાનો તેનો પ્રવાસ સહેજ પણ સરળ નહોતો. ફિલ્મ ઈન્ડસ્ટ્રીમાં પગ જમાવતા પહેલા તેને અસંખ્ય રિજેક્શન (અસ્વીકાર) નો સામનો કરવો પડ્યો હતો. એક સમય એવો આવ્યો હતો કે તે અંદરથી સાવ ભાંગી પડી હતી. પીઢ અભિનેત્રી સિમી ગ્રેવાલના પ્રખ્યાત ચેટ શો "રેન્ડેઝવસ વિથ સિમી ગ્રેવાલ" માં વાતચીત દરમિયાન વિદ્યાએ તેના જીવનની એ સૌથી યાદગાર અને ટર્નિંગ પોઈન્ટ સાબિત થયેલી ક્ષણને વાગોળી છે, જ્યારે તેને કરિયરની પહેલી બોલિવૂડ ફિલ્મ "પરિણીતા" મળી હતી.

એનરિક ઇગ્લેસિયસના લાઈવ કોન્સર્ટમાં બંધ હતો ફોન

પોતાના સંઘર્ષના દિવસોને યાદ કરતાં વિદ્યા બાલને જણાવ્યું કે, "તે સમયે મેં એટલા બધા ઓડિશન આપ્યા હતા અને દરેક વખતે નકારી કઢાતા મને લાગવા માંડ્યું હતું કે આ ફિલ્મ પણ મારા હાથમાંથી ગઈ. મેં લગભગ આશા જ છોડી દીધી હતી." વિદ્યાએ આગળ જણાવ્યું કે, જે દિવસે તેનું નસીબ ચમકવાનું હતું તે દિવસે તે પ્રખ્યાત ઇન્ટરનેશનલ સિંગર એનરિક ઇગ્લેસિયસના લાઈવ મ્યુઝિક કોન્સર્ટમાં ગઈ હતી. કોન્સર્ટમાં કોઈ ખલેલ ન પડે તે માટે વિદ્યાએ પોતાનો મોબાઈલ ફોન સ્વીચ ઓફ કરી દીધો હતો. પરંતુ નસીબને કંઈક અલગ જ મંજૂર હતું. તેની સાથે રહેલા એક મિત્ર પર (જેણે દિગ્દર્શક પ્રદીપ સરકાર સાથે કામ કર્યું હતું) અચાનક ડાયરેક્ટર પ્રદીપ સરકાર ઉર્ફે 'દાદા' નો ફોન આવ્યો.

"વિધુ વિનોદ ચોપરા તારી સાથે વાત કરવા માંગે છે..."

કોન્સર્ટના ઘોંઘાટ વચ્ચે મિત્રના ફોન પર દાદાએ પૂછ્યું, "વિદ્યા ક્યાં છે? શું તે કોન્સર્ટમાં છે?" મિત્રએ હા પાડતા જ ફોન વિદ્યાને સોંપવામાં આવ્યો અને સામે છેડેથી અવાજ આવ્યો, "શ્રી વિધુ વિનોદ ચોપરા તમારી સાથે વાત કરવા માંગે છે."

વિદ્યાએ કહ્યું, "તે સમયે મને પાકી ખાતરી હતી કે આ ફોન મને એ કહેવા માટે જ આવ્યો હશે કે મારી પસંદગી નથી થઈ. પરંતુ બીજી જ સેકન્ડે મેં ફોન પર જે શબ્દો સાંભળ્યા, તેણે મારા રૂવાડાં ઊભા કરી દીધા અને મારું આખું જીવન બદલાઈ ગયું." પ્રખ્યાત નિર્માતા વિધુ વિનોદ ચોપરાએ સામેથી કહ્યું: "વિદ્યા બાલન, તું જ મારી પરિણીતા છે. મને તારા પર પૂરો ભરોસો છે અને મને વિશ્વાસ છે કે તું આ વિશ્વાસનું હંમેશા સન્માન કરીશ."

૧૯૧૪ ની નવલકથા પર બનેલી ક્લાસિક ફિલ્મ

નોંધનીય છે કે, વર્ષ ૨૦૦૫ માં આવેલી 'પરિણીતા' ફિલ્મ ૧code૯૧૪ માં પ્રકાશિત થયેલી પ્રખ્યાત બંગાળી નવલકથાકાર શરતચંદ્ર ચટ્ટોપાધ્યાયની આ જ નામની નવલકથા પર આધારિત હતી. પ્રદીપ સરકારના દિગ્દર્શનમાં બનેલી આ પહેલી ફિલ્મ હતી, જેમાં વિદ્યા બાલનની સાથે સૈફ અલી ખાન અને સંજય દત્ત મુખ્ય ભૂમિકામાં હતા. જ્યારે રાયમા સેન, સબ્યસાચી ચક્રવર્તી અને દિયા મિર્ઝાએ પણ મહત્વના પાત્રો ભજવ્યા હતા. ૧૦ જૂન, ૨૦૦૫ ના રોજ રીલીઝ થયેલી આ ફિલ્મે બોક્સ ઓફિસ પર ધૂમ કમાણી કરવાની સાથે વિવેચકોની પણ ભારે વાહવાહી મેળવી હતી અને વિદ્યા બાલનને રાતોરાત સ્ટાર બનાવી દીધી હતી.