તારક મહેતા કા ઉલ્ટા ચશ્મા (TMKOC) શોમાં 'બાપુજી' એટલે કે ચંપક લાલ ગડાનું આઈકોનિક પાત્ર ભજવનાર અભિનેતા અમિત ભટ્ટ પોતાની અદાકારીથી વર્ષોથી લોકોના દિલ જીતી રહ્યા છે. શોમાં વૃદ્ધ પિતાની ભૂમિકા ભજવવા માટે તેઓ જે ટ્રાન્સફોર્મેશનમાંથી પસાર થાય છે તે ખરેખર પ્રશંસનીય છે. તાજેતરમાં જ શોના સેટ પરથી તેમનો એક એવો વીડિયો કેમેરામાં કેપ્ચર થયો છે, જેમાં તેમની ગાંધી ટોપી વગરનો અસલી અવતાર જોવા મળ્યો હતો.

સબ ટીવીનો ઓલ-ટાઈમ ફેવરિટ કોમેડી શો 'તારક મહેતા કા ઉલ્ટા ચશ્મા' પોતાના સફળતાપૂર્વકના 18 વર્ષ પૂર્ણ કરી ચૂક્યો છે. વર્ષ 2008માં શરૂ થયેલી આ સફર આજે પણ દર્શકોને મનોરંજન પૂરું પાડી રહી છે. નિર્માતા અસિત કુમાર મોદી દ્વારા સેટ પર જ આ પ્રસંગે ખાસ ઉજવણી રાખવામાં આવી હતી, જ્યાં શોના તમામ કલાકારો એકઠા થયા હતા.

ઇવેન્ટ પત્યા બાદ જ્યારે અમિત ભટ્ટ પોતાના મેકઅપ રૂમ તરફ જઈ રહ્યા હતા ત્યારે પાપારાઝીના કેમેરામાં તેમનો બહુભાષીય લુક કેપ્ચર થઈ ગયો હતો.

શોમાં ચંપકલાલ બનવા માટે અમિત ભટ્ટ જે ગાંધી ટોપી પહેરે છે, તે તેમણે શૂટિંગ પત્યા બાદ કાઢી હતી. ટોપી હટાવતા જ તેમના માથા પર ઘાટા કાળા વાળ અને બાજુમાં બે સફેદ હેર પેચ સ્પષ્ટ દેખાતા હતા. આ સફેદ હેર પેચ તેમને બાપુજી જેવા વૃદ્ધ બતાવવામાં મદદ કરે છે.

ઉલ્લેખનીય છે કે, શરૂઆતમાં તેઓ ચંપકલાલના લુક માટે વિગ (Wig)નો ઉપયોગ કરતા હતા. પરંતુ જ્યારે તેમને લાગ્યું કે વિગ કેમેરા પર નકલી અને અનનેચરલ લાગે છે, ત્યારે તેમણે પોતે સલૂનમાં જઈને માથું મુંડાવી દીધું હતું.

અમિત ભટ્ટે એક ઈન્ટરવ્યુમાં જણાવ્યું હતું કે, શોમાં બાપુજીનો પરફેક્ટ લુક જાળવી રાખવા માટે તેમણે બોર્ડર પરના વાળ રાખીને વચ્ચેથી 283 વખત ટાલ કરાવી હતી. સતત મુંડન કરાવવાને કારણે તેમના સ્કેલ્પને નુકસાન પહોંચવા લાગ્યું હતું. ત્યારબાદ મેકર્સે તેમના પાત્રમાં ગાંધી ટોપીનો ઉમેરો કર્યો હતો, જેથી તેમને વારંવાર ટાલ કરાવવી ન પડે.

રિયલ લાઈફમાં અમિત ભટ્ટ જેઠાલાલનું પાત્ર ભજવતા દિલીપ જોશી કરતા ઉંમરમાં નાના છે. તારક મહેતા પહેલા પણ આ બંને કલાકારોએ સાથે ઘણા નાના-મોટા શૉ કર્યા હતા. ઓનસ્ક્રીન બાપુજી અને જેઠાલાલ વચ્ચેની ખાટી-મીઠી કેમેસ્ટ્રી આજે પણ દર્શકોને ખૂબ પસંદ આવે છે અને આ જુગલબંધીએ શોને સફળ બનાવવામાં મોટો ભાગ ભજવ્યો છે.