મુંબઈ, તા.30: બોલીવુડના ઈતિહાસની સૌથી મોંઘી અને મોસ્ટ અવેટેડ ફિલ્મ 'રામાયણ ભાગ-1' નું ધમાકેદાર ટ્રેલર આખરે રિલીઝ થઈ ગયું છે. ટ્રેલરમાં રણબીર કપૂર (ભગવાન રામ), સાઈ પલ્લવી (સીતા) અને સાઉથ સુપરસ્ટાર યશ (રાવણ) ના અદ્ભુત લુકની સાથે જેણે સૌથી વધુ દર્શકોનું ધ્યાન ખેંચ્યું છે, તે છે અભિનેતા વિવેક ઓબેરોય. ટ્રેલરમાં માત્ર 2 સેકન્ડ માટે દર્શાવવામાં આવેલા વિવેક ઓબેરોયના લુકે ઇન્ટરનેટ પર સનસનાટી મચાવી દીધી છે.
ટ્રેલરમાં વિવેક ઓબેરોય અને રાવણનું પાત્ર ભજવી રહેલા યશ વચ્ચે એક ભયાનક યુદ્ધ દ્રશ્ય બતાવવામાં આવ્યું છે. આ દ્રશ્ય જોયા બાદ ફેન્સમાં ભારે ઉત્સુકતા જાગી છે કે ફિલ્મમાં વિવેકની ભૂમિકા શું છે. પૌરાણિક કથા મુજબ, વિવેક ઓબેરોય ફિલ્મમાં 'વિદ્યુતજિહ્વા' નું પાત્ર ભજવી રહ્યા છે. વિદ્યુતજિહ્વા એ રાવણની બહેન શૂર્પનખાનો પતિ અને કલ્કેય રાક્ષસ કુળનો રાજકુમાર હતો, જે રાવણનો મોટો શત્રુ ગણાતો હતો અને બાદમાં રાવણે યુદ્ધમાં તેનો વધ કર્યો હતો.
સોશિયલ મીડિયા પર નેટિઝન્સ વિવેક ઓબેરોયના આ રાક્ષસી અને આક્રમક અવતારના મુક્ત મને વખાણ કરી રહ્યા છે. લોકોનું કહેવું છે કે આ વિલન અને યોદ્ધાનો રોલ વિવેક માટે જ બન્યો છે. નિતેશ તિવારીના નિર્દેશનમાં બનેલી ₹4,000 કરોડના વિશાળ બજેટવાળી આ ભવ્ય ફિલ્મ આ વર્ષે દિવાળી પર સિનેમાઘરોમાં રિલીઝ થવા જઈ રહી છે, જેને લઈને સિનેપ્રેમીઓમાં અત્યારથી જ ભારે ક્રેઝ જોવા મળી રહ્યો છે.