મુંબઈ : વર્ષ ૨૦૨૬ ની દિવાળી બોક્સ ઓફિસ પર અત્યાર સુધીની સૌથી મોટી ટક્કર લઈને આવી રહી છે. ફિલ્મ નિર્માતાઓ દિવાળીના લાંબા તહેવારી સપ્તાહાંતની રજાઓનો મહત્તમ લાભ લેવા માટે ઉતાવળા બન્યા છે. નિતેશ તિવારીના દિગ્દર્શન હેઠળ બનેલી અત્યંત ચર્ચાસ્પદ અને બહુપ્રતિક્ષિત ફિલ્મ 'રામાયણ' હવે સિનેમાઘરોમાં ધમાકો કરવા માટે સજ્જ છે. જોકે, બોક્સ ઓફિસ પર તેની રાહ સરળ નથી રહેવાની, કારણ કે તે જ દિવસે જાપાનની સુપર-હિટ હોલીવુડ ફ્રેન્ચાઇઝી 'ગોડઝિલા માઇનસ ઝીરો' સાથે જોરદાર ટક્કર થવાની છે.

અગાઉ નિતેશ તિવારીની 'રામાયણ' ૩૦ ઓક્ટોબરે રિલીઝ થવાની હતી, પરંતુ દિવાળીના લાંબા વેકેશન અને તહેવારોના માહોલને ધ્યાનમાં રાખીને નિર્માતાઓએ તેની રિલીઝ ડેટ બદલીને ૬ નવેમ્બર, ૨૦૨૬ (ધનતેરસ) કરી દીધી છે. આ જ દિવસે 'ગોડઝિલા માઇનસ ઝીરો' પણ વિશ્વભરમાં રિલીઝ થઈ રહી છે. બંને ફિલ્મોના મેકર્સ પ્રીમિયમ ફોર્મેટ્સ અને આઇમેક્સ (IMAX) સ્ક્રીન્સ પર કબજો જમાવવા માટે સંપૂર્ણપણે તૈયાર છે, જેના કારણે બોક્સ ઓફિસ પર કોણ બાજી મારશે તે જોવું રસપ્રદ બનશે.

ભારતમાં 'ગોડઝિલા'નો શાનદાર ઇતિહાસ અને 'રામાયણ'નો ભવ્ય ક્રેઝ

જાપાનની આઇકોનિક 'ગોડઝિલા' ફ્રેન્ચાઇઝી ભારતીય દર્શકોમાં પહેલેથી જ ખૂબ લોકપ્રિય રહી છે. અગાઉ રિલીઝ થયેલી ફિલ્મોએ ભારતીય બોક્સ ઓફિસ પર કરોડોની કમાણી કરી હતી:

• ગોડઝિલા (૨૦૧૪) - ₹૩૪-૩૫ કરોડ

• ગોડઝિલા: કિંગ ઓફ મોન્સ્ટર્સ (૨૦૧૯) - ₹૨૫.૩૦ કરોડ

• ગોડઝિલા વિરુદ્ધ કોંગ (૨૦૨૧) - ₹૪૮.૫૮ કરોડ

• ગોડઝિલા એન્ડ કોંગ: ધ ન્યૂ એમ્પાયર (૨૦૨૪) - ₹૧૧૨.૫૪ કરોડ

બીજી બાજુ, ભારતમાં 'રામાયણ' નામની સાથે જ એક અલગ જ આસ્થા અને ક્રેઝ જોડાયેલો છે. રામાનંદ સાગરની ટેલિવિઝન રામાયણથી લઈને અત્યાર સુધી લોકો આ ગાથાને અઢળક પ્રેમ આપતા આવ્યા છે. હવે અંદાજે ₹૪૦૦૦ કરોડના ભવ્ય બજેટ અને વિઝ્યુઅલ ઇફેક્ટ્સ સાથે આવી રહેલી આ ફિલ્મના સ્ટારકાસ્ટમાં રણબીર કપૂર, સાઈ પલ્લવી, સની દેઓલ, યશ, રવિ દુબે અને રકુલ પ્રીત સિંહ જેવા દિગ્ગજ કલાકારો સામેલ છે. દિવાળી અને ભાઈબીજ જેવા તહેવારો વચ્ચે આ બંને ફિલ્મોમાંથી કઈ ફિલ્મ દર્શકોના દિલ જીતીને ઇતિહાસ રચશે, તે સમય જ બતાવશે.