મુંબઈ : ભારતીય ઓટીટી (OTT) સ્પેસમાં નવો ઇતિહાસ રચનાર સુપરહિટ વેબ સીરીઝ 'મિર્ઝાપુર' હવે મોટા પડદા પર 'ભૌકાલ' મચાવવા માટે સંપૂર્ણપણે તૈયાર છે. મંગળવારે મુંબઈમાં આયોજિત એક ભવ્ય કાર્યક્રમમાં કલાકારો અને મેકર્સની હાજરી વચ્ચે 'મિર્ઝાપુર ધ મૂવી' (Mirzapur The Movie) નું બહુપ્રતિક્ષિત ટ્રેલર સત્તાવાર રીતે રિલીઝ કરવામાં આવ્યું છે. સીરીઝની ત્રણ સફળ સીઝન બાદ, આ વાર્તાને સિનેમાઘરોમાં મોટા કેનવાસ પર જોવા માટે ચાહકોમાં અબજો ગણો ઉત્સાહ જોવા મળી રહ્યો છે.

જૂના કલાકારો સાથે નવા ચહેરાનું જોરદાર કોમ્બિનેશન

ટ્રેલર પરથી સ્પષ્ટ સંકેત મળે છે કે આ ફિલ્મ પ્રેક્ષકોને ફરી એકવાર વાર્તાના મૂળ તબક્કા તરફ લઈ જશે, જ્યાં કાલીન ભૈયા (પંકજ ત્રિપાઠી) નું વર્ચસ્વ છે અને તેને પોતાની ગાદી બચાવવા માટે કઠિન પડકારોનો સામનો કરવો પડે છે. પંકજ ત્રિપાઠી, અલી ફઝલ, દિવ્યેન્દુ, રસિકા દુગલ અને રવિ કિશને પોતાના શાનદાર પ્રદર્શનથી ટ્રેલરમાં જીવ પૂરી દીધો છે. આ વખતે શ્રેણીમાં રવિ કિશનની નવી સરપ્રાઈઝ એન્ટ્રીએ ફિલ્મ પ્રત્યેની ઉત્સુકતા બેગણી કરી દીધી છે.

બબલુના પાત્રમાં થયો મોટો ફેરફાર

આ ફિલ્મનું સૌથી મોટું સરપ્રાઈઝ 'પંચાયત' ફેમ જીતેન્દ્ર કુમારની એન્ટ્રી છે. સીરીઝમાં વિક્રાંત મેસીએ 'બબલુ પંડિત' તરીકે અદ્ભુત અભિનય કર્યો હતો, પરંતુ હવે ફિલ્મમાં આ પાત્રમાં જીતેન્દ્ર કુમાર જોવા મળશે. જીતેન્દ્ર આ આક્રમક પાત્ર સાથે કેવો ન્યાય આપે છે તે જોવું અત્યંત રસપ્રદ રહેશે. ટ્રેલરમાં હિંસા, ગાળો, લોહિયાળ જંગ અને ડ્રામાનો એ જ જૂનો મસાલો ડબલ ડોઝમાં પીરસવામાં આવ્યો છે, જેને વિઝ્યુઅલ ઈફેક્ટ્સ અને મોટો લુક આપવામાં આવ્યો છે.

આ તારીખે સિનેમાઘરોમાં થશે ધમાકેદાર રિલીઝ

ગુરમીત સિંહના નિર્દેશનમાં બનેલી આ ફિલ્મ ૪ સપ્ટેમ્બર, ૨૦૨૬ ના રોજ સિનેમાઘરોમાં રિલીઝ થવાની છે. ભારતીય સિનેમાના ઇતિહાસમાં આ પ્રથમ વખત બની રહ્યું છે કે કોઈ લોકપ્રિય વેબ સીરીઝને સીધી ફિચર ફિલ્મ તરીકે બોક્સ ઓફિસ પર ઉતારવામાં આવી રહી છે. હવે એ જોવાનું રહેશે કે નાના પડદા પર રાજ કરનારા 'મિર્ઝાપુર'ના કલાકારો મોટા પડદા પર કેટલી કમાણી કરે છે.