મુંબઈ, તા.૨૫: બોલીવુડ અભિનેત્રી ભૂમિ પેડણેકર અવારનવાર પોતાની ફિલ્મો અને સામાજિક મુદ્દાઓ પર રજૂ કરાતા વિચારોને કારણે ચર્ચામાં રહેતી હોય છે. તાજેતરમાં જંતર-મંતર પર કોકરોચ જનતા પાર્ટી (CJP)ના આંદોલન અંગે નિવેદન આપવા બદલ તેને સોશિયલ મીડિયા પર ટ્રોલ થવું પડ્યું હતું, તો બીજી તરફ પૂર રાહત કાર્યોમાં તેના યોગદાન માટે ફેન્સે તેની પ્રશંસા પણ કરી હતી. જોકે, હાલમાં જ ભૂમિનો એક નવો અંદાજ સોશિયલ મીડિયા પર વાયરલ થઈ રહ્યો છે, જેણે નેટીઝન્સના દિલ જીતી લીધા છે.

મુંબઈ ખાતે યોજાયેલા ‘સર્વોત્તમ નાગરિક સમ્માન ૨૦૨૬’ એવોર્ડ શો દરમિયાન ભૂમિ પેડણેકરે હાજરી આપી હતી. રેડ કાર્પેટ પર જ્યારે તે પેપરાઝી (ફોટોગ્રાફર્સ) માટે અલગ-અલગ પોઝ આપી રહી હતી, ત્યારે જ અચાનક બેકગ્રાઉન્ડમાં રાષ્ટ્રગાન 'જન ગણ મન' વાગવાનું શરૂ થયું હતું. રાષ્ટ્રગાનનો અવાજ કાને પડતાં જ ભૂમિએ ક્ષણનો પણ વિલંબ કર્યા વિના ફોટોગ્રાફર્સને થોભી જવાનો ઈશારો કર્યો હતો અને તાત્કાલિક સાવધાનની મુદ્રામાં ઊભી રહીને રાષ્ટ્રગાન પ્રત્યે પૂર્ણ આદર વ્યક્ત કર્યો હતો.

કેમેરા અને ફેમ કરતાં પણ દેશના સન્માનને પ્રથમ પ્રાધાન્ય આપવાના ભૂમિના આ આદરણીય વર્તનને જોઈને સોશિયલ મીડિયા યુઝર્સે તેના પર પ્રશંસાનો વરસાદ વરસાવ્યો છે. વીડિયો વાયરલ થતાં જ એક યુઝરે લખ્યું, "ફ્રેમની ચિંતા નહીં, કેમેરાનું ઝનૂન નહીં, પહેલા દેશ! બોલીવુડમાં આવાં સંસ્કારો ક્યાં જોવા મળે છે? ભૂમિને સલામ." જ્યારે અન્ય એક ફેને લખ્યું કે તે આ પ્રશંસાની સાચે જ હકદાર છે.

વર્કફ્રન્ટની વાત કરીએ તો, ભૂમિ પેડણેકર તાજેતરમાં 'મેરે હસ્બન્ડ કી બીવી', 'ખેલ ખેલ મેં' અને 'ભક્ષક' જેવી ફિલ્મોમાં જોવા મળી હતી. આ ઉપરાંત, આ વર્ષે તેની થ્રિલર વેબ સિરીઝ 'દલદલ' પણ રિલીઝ થઈ છે, જેને ક્રિટિક્સ અને દર્શકો તરફથી મિશ્ર પ્રતિસાદ મળ્યો છે. ફિલ્મી દુનિયામાં ગમે તેવા ઉતાર-ચઢાવ આવે, પરંતુ ભૂમિના આ દેશપ્રેમ ભરેલા અંદાજે લાખો લોકોના દિલમાં તેના માટે એક ખાસ સ્થાન બનાવી લીધું છે.