મુંબઈ: ચર્ચિત અને લોકપ્રિય રિયાલિટી શો ‘ધ ટ્રેટર્સ સીઝન ૨’ ના તાજેતરમાં સંપન્ન થયેલા ફિનાલે બાદ સોશિયલ મીડિયા પર વિજેતા રિદા થરાનાની જીતને લઈને ભારે ચર્ચા અને વિવાદ ઊભો થયો છે. ગુરુવાર ૩ સપ્ટેમ્બરના રોજ શોના મેકર્સ દ્વારા ક્રિસ્ટલ ડિસૂઝા અને રિદા થરાનાને સંયુક્ત રીતે વિજેતા જાહેર કરવામાં આવ્યા હતા. આ જાહેરાત બાદ તરત જ સોશિયલ મીડિયાના અનેક યુઝર્સે રિદાની જીત સામે સવાલો ઉઠાવીને તેને ટ્રોલ કરવાનું શરૂ કર્યું હતું. આ તીખી ટીકાઓ વચ્ચે સોશિયલ મીડિયા ઇન્ફ્લુએન્સર રિદા થરાનાએ મૌન તોડીને ટ્રોલર્સને સ્પષ્ટ અને આકરો જવાબ આપ્યો છે.

રિદાએ પોતાના સત્તાવાર ઇન્સ્ટાગ્રામ એકાઉન્ટ પર એક વિસ્તૃત નિવેદન જાહેર કરતાં જણાવ્યું હતું કે, તેની આ મોટી જીતનો શ્રેય માત્ર ખેલ દરમિયાન તેને મળેલા ‘ટ્રેટર’ (ગદ્દાર) ના પાત્રને જ ન આપવો જોઈએ. તેણે દર્શકોને વિનંતી કરી હતી કે તેઓ માત્ર શોના છેલ્લા દિવસોના ખેલને જોવાના બદલે તેની આખી ગેમિંગ જર્નીનું મૂલ્યાંકન કરે. રિદાએ સ્વીકાર્યું હતું કે જ્યારે તેને ‘ટ્રેટર’ બનાવવામાં આવી ત્યારે તેણે માનસિક અને ભાવનાત્મક રીતે ખૂબ મોટો સંઘર્ષ કરવો પડ્યો હતો, પરંતુ તેણે તમામ મુશ્કેલીઓનો સામનો કરીને પોતાના નિર્ણયોનો બચાવ કર્યો હતો.

પોતાની વાત રજૂ કરતાં રિદાએ ઉમેર્યું હતું કે, લોકોએ એ યાદ રાખવું જોઈએ કે તેની આખી ગેમ માત્ર એક ટ્રેટર તરીકે નહોતી રમાઈ. તેણે શોની શરૂઆત એક ‘ઇનોસન્ટ’ (નિર્દોષ) તરીકે કરી હતી અને આખી રમતમાં તે એ જ રીતે રમી હતી. એટલું જ નહીં, તેણે રમત દરમિયાન એક અસલી ટ્રેટરની ઓળખ પણ સફળતાપૂર્વક કરી લીધી હતી. પોતાની માનસિક સ્થિતિ વિશે વાત કરતાં તેણે કહ્યું કે તે સૌથી નીડર ટ્રેટર નહોતી; તે ડરી ગઈ હતી, તેને જૂઠ્ઠું બોલવામાં તકલીફ પડતી હતી, તે રડી હતી અને પોતાની જાત પર સવાલો પણ ઉઠાવતી હતી.

રમાયેલા ખેલના બંને પાસાં પર પ્રકાશ પાડતાં રિદાએ જણાવ્યું કે, એક ઇનોસન્ટ તરીકે તે અત્યંત મહત્વાકાંક્ષી અને રણનીતિક હતી, જ્યારે ટ્રેટર બન્યા બાદ તે અત્યંત લાગણીશીલ બની ગઈ હતી. તેણે અંતમાં સ્પષ્ટ કર્યું કે ઇનોસન્ટ રહેવાથી લઈને ટ્રેટર બનવા સુધી, સાચા-ખોટા નિર્ણયો લેવા, લોકો પર વિશ્વાસ કરવો, વિશ્વાસઘાત સહન કરવો અને રડવા છતાં રમતમાં ટકી રહેવાની આ આખી પ્રક્રિયા જ તેની સાચી જીત છે.