મુંબઈ : બોલિવૂડની પ્રખ્યાત અભિનેત્રી બિપાશા બસુએ તાજેતરમાં માતા બન્યા પછીના પોતાના મુશ્કેલ દિવસોને યાદ કર્યા છે. વર્ષ 2022માં પતિ કરણ સિંહ ગ્રોવર સાથે પુત્રી દેવી બસુ સિંહ ગ્રોવરને જન્મ આપનાર આ જાણીતી અભિનેત્રીએ બાળકના જન્મ બાદ સામનો કરેલા ગંભીર બોડી-શેમિંગ અને ટ્રોલિંગ અંગે નિખાલસતાથી વાત કરી છે.

બિપાશા બસુએ મહિલાઓના શરીર અંગે સમાજમાં થતી ચર્ચાઓને અત્યંત વિચિત્ર અને પાયાવિહોણી ગણાવી છે. તેમણે દુઃખ વ્યક્ત કરતા જણાવ્યું કે કેવી રીતે મહિલાના માતા બનતા જ સમાજ એવું અપેક્ષા રાખે છે કે તે પોતાની વીસની વયના ફિગરમાં તુરંત પાછી ફરી જાય, ભલે તેની ઉંમર ચાલીસીમાં કેમ ન પહોંચી ગઈ હોય. ચાલીસ વર્ષની મહિલા પાસેથી પણ એ જ ફિટનેસની અપેક્ષા રાખવામાં આવે છે જે વીસ વર્ષની યુવતી પાસેથી રખાય છે.

અભિનેત્રીએ જણાવ્યું કે જે મહિલાઓ બાળકના જન્મ પછી ઝડપથી પોતાના જૂના આકારમાં પાછી નથી ફરતી, તેમને અવારનવાર અત્યંત ક્રૂરતાપૂર્વક ટ્રોલ કરવામાં આવે છે. તેમણે ખુલાસો કર્યો કે દીકરીના જન્મ પછી તેમને પણ આ પ્રકારના ભારે અને આઘાતજનક ટ્રોલિંગનો સામનો કરવો પડ્યો હતો. આ પ્રકારની નકારાત્મકતાનો સામનો કરવો કોઈપણ નવી માતા માટે ખૂબ જ પીડાડાયક હોય છે.

આ મુશ્કેલ સમય દરમિયાન પેપારાઝીના અસંવેદનશીલ વલણ પર પ્રહાર કરતા બિપાશાએ જણાવ્યું કે કેટલાક ફોટોગ્રાફર્સે તે સમયગાળા દરમિયાન તેમની ખૂબ જ વિચિત્ર અને વાંધાજનક તસવીરો ક્લિક કરી હતી. તેમણે ઉમેર્યું કે કોઈ એ વાત સમજવા તૈયાર નથી હોતું કે એક મહિલા જ્યારે બાળકને જન્મ આપે છે, ત્યારે તે પોતાના બાળકની સંભાળ, પારિવારિક જવાબદારીઓ અને અંગત જીવનને સંભાળવામાં કેટલી બધી મહેનત કરી રહી હોય છે.

આ તમામ નકારાત્મકતા અને અવાસ્તવિક અપેક્ષાઓ છતાં, બિપાશાએ જણાવ્યું કે તે પોતાના આત્મવિશ્વાસને મક્કમ રાખે છે અને લોકોની નકારાત્મક વાતોને પોતાના નિર્ણયો પર હાવી થવા દેતી નથી. તે પોતાની સફરને સારી રીતે જાણે છે અને પોતાના લક્ષ્યોને હાંસલ કરવા માટે જરૂરી મહેનતથી સંપૂર્ણપણે પરિચિત છે.