મુંબઈ: 'ધ રેબેલ કીડ' ના નામે સોશિયલ મીડિયા પર પોતાની આગવી ઓળખ બનાવનાર લોકપ્રિય ઈન્ફ્લુએન્સર અપૂર્વ મખીજા ફરી એકવાર ચર્ચામાં આવી છે. ન્યૂયોર્કથી શેર કરેલા પોતાના એક નવા વિડીયોમાં અપૂર્વએ અગાઉ થયેલા 'કોચેલા કલાવા વિવાદ' પર ખુલીને વાત કરી છે અને પોતાની જિંદગીના એ મુશ્કેલ તબક્કાને યાદ કર્યો છે. તેમણે ખુલાસો કર્યો હતો કે આ વિવાદ અને સોશિયલ મીડિયા પર થયેલી તીખી ટ્રોલિંગે તેમની માનસિક સ્થિતિ પર ઊંડી નકારાત્મક અસર પાડી હતી, જેને કારણે ઊંઘમાંથી જાગવાનું પણ મન થતું નહોતું.

આ સમગ્ર વિવાદની શરૂઆત ત્યારે થઈ હતી જ્યારે અપૂર્વ આંતરરાષ્ટ્રીય સંગીત મહોત્સવ 'કોચેલા' માં ભાગ લેવા ગઈ હતી. ત્યાં તેણે પોતાની કલાઈ પર બાંધેલો પવિત્ર કલાવા (નાડાછડી) માત્ર એ વિચારથી કાપી નાખ્યો હતો કે તે તેની એસ્થેટિક તસવીરોના લૂકમાં રૂકાવટ બની રહ્યો હતો. જ્યારે આ વિડીયો ઈન્ટરનેટ પર વાયરલ થયો ત્યારે તેને ભારે ટ્રોલિંગનો સામનો કરવો પડ્યો હતો અને લોકોએ તેના ચરિત્ર પર પણ સવાલો ઉઠાવ્યા હતા.

વિડીયોમાં પોતાના એ નિર્ણય સ્પષ્ટ કરતા અપૂર્વએ જણાવ્યું હતું કે તેણે કલાવા કાપતા પહેલાં ઝાઝું વિચાર્યું નહોતું, તેને માત્ર એવું લાગ્યું કે એ દોરો તેની તસવીરોનો લૂક બગાડી રહ્યો છે. તેણે ઉમેર્યું કે ઈશ્વર સાથે તેનો સંબંધ હજુ નવો છે અને તે માનતી હતી કે ભગવાન સાથે કોઈ કડક નિયમો જોડાયેલા નથી હોતા.

જોકે, અપૂર્વએ એ વાતનો સ્વીકાર કર્યો હતો કે તેના આ અવિચારી પગલાથી ધાર્મિક પરંપરાઓમાં ઊંડી આસ્થા ધરાવતા લોકોની લાગણી દુભાઈ હતી. આ વિવાદ બાદ ઈન્ટરનેટ પર થયેલા ભારે વિરોધ અને માનસિક તણાવમાંથી બહાર આવવા માટે તેણે બાલીની એકલી જ (સોલો) ટ્રિપ કરી હતી. અપૂર્વનું કહેવું છે કે હવે તે સમય સાથે પોતાને સંભાળવાનો પ્રયાસ કરી રહી છે અને પોતાની જિંદગીની દરેક બાબતને ખૂબ જ સાવચેતીપૂર્વક જોઈ રહી છે.