મુંબઈ : બોલીવૂડની ગ્લેમરસ એક્ટ્રેસ દિશા પટણી અને તેની મોટી બહેન તથા પૂર્વ આર્મી ઓફિસર ખુશબૂ પટણી હાલમાં સોશિયલ મીડિયા પર ભારે ચર્ચાનું કેન્દ્ર બન્યા છે. એક તરફ સોશિયલ મીડિયા પર બંને સગા બહેનોની જન્મતારીખ વચ્ચેના માત્ર છ મહિનાના તફાવતને લઈને અટકળો ચાલી રહી છે, તો બીજી તરફ ખુશબૂ પટણી દ્વારા મહિલાઓની સુરક્ષાને લઈને આપવામાં આવેલું એક મોટું નિવેદન વાયરલ થઈ રહ્યું છે. ખુશબૂએ મહિલાઓને આત્મરક્ષણ (સેલ્ફ ડિફેન્સ) માટે એર પિસ્ટલ પોતાની પાસે રાખવાની સલાહ આપી છે.

ખુશબૂ પટણીએ એર પિસ્ટલના ઉપયોગ અને તેના ફાયદા વિશે કરી ખુલીને વાત

રવિવારે 'ડોટર્સ ડે'ના અવસરે ઇન્સ્ટાગ્રામ પર એક વીડિયો શેર કરતા ખુશબૂ પટણીએ જણાવ્યું હતું કે વર્તમાન સમયમાં મહિલાઓએ પોતાની સુરક્ષા માટે ખુદ સક્ષમ બનવું પડશે. તેણે વીડિયોમાં સ્પષ્ટ કર્યું હતું કે એર પિસ્ટલનો ઉપયોગ કરવા માટે કોઈ લાઈસન્સની જરૂર હોતી નથી અને તેમાં કોઈ ઘાતક કારતુસ કે બારૂદને બદલે કાર્બન ડાયોક્સાઇડ (CO2) નો ઉપયોગ થાય છે. ૩૪ વર્ષીય ખુશબૂએ યુવતીઓને નજીકની શૂટિંગ રેન્જમાં જઈને તેની ટ્રેનિંગ લેવા અને કોઈપણ પર નિર્ભર ન રહેવા અપીલ કરી છે. તેનો આ વીડિયો સોશિયલ મીડિયા પર આગની જેમ ફેલાઈ ગયો છે અને યુઝર્સ તરફથી તેને મિશ્ર પ્રતિક્રિયાઓ મળી રહી છે.

કોણ છે ખુશબૂ પટણી? આર્મીની નોકરી છોડીને ફિટનેસ ક્ષેત્રે મેળવી રહી છે ખ્યાતિ

બોલીવૂડની ચમક-દમકથી દૂર રહીને દેશસેવાનો માર્ગ અપનાવનાર ખુશબૂ પટણી મૂળ બરેલીની વતની છે. ઇલેક્ટ્રિકલ એન્જિનિયરિંગનો અભ્યાસ પૂર્ણ કર્યા બાદ તેણે કોર્પોરેટ નોકરી છોડીને ભારતીય સેનામાં જોડાઈ હતી અને એક દાયકા કરતાં વધુ સમય સુધી મેજર/ઓફિસર તરીકે દેશની સેવા કરી છે. આર્મીમાંથી નિવૃત્તિ લીધા બાદ તે પોતાની બહેન દિશા પટણીની જેમ જ ફિટનેસ ફ્રીક તરીકે સોશિયલ મીડિયા પર ખૂબ સક્રિય રહે છે અને યુવાનોને પ્રેરણા આપે છે. હાલમાં તેના આ એર પિસ્ટલ વાળા નિવેદને દેશભરમાં એક નવી ચર્ચા જગાવી દીધી છે.