ઓટાવા : સાઉથના સુપરસ્ટાર રજનીકાંતના ચાહકો માટે કેનેડાથી એક નિરાશાજનક સમાચાર સામે આવ્યા છે. કેનેડાના જાણીતા 'યોર્ક સિનેમાઝ' (York Cinemas) ખાતે રજનીકાંત અભિનીત હિટ ફિલ્મ 'જેલર 2' (Jailer 2) ના પ્રદર્શનો અનિશ્ચિત સમય માટે અટકાવી દેવામાં આવ્યા છે. થિયેટર સંચાલકોના જણાવ્યા મુજબ, ફિલ્મ દર્શાવવા માટે અત્યંત આવશ્યક એવી 'ડિજિટલ કી' (digital keys) સમયસર ઉપલબ્ધ ન થવાને કારણે આ સખત પગલું ભરવું પડ્યું છે. આ અચાનક થયેલા વિરામથી થિયેટર બહાર પહોંચેલા દર્શકોમાં ભારે નારાજગી જોવા મળી રહી છે.

સોશિયલ મીડિયા પર એક સત્તાવાર નિવેદન જારી કરતા 'યોર્ક સિનેમાઝ' સ્પષ્ટ કર્યું છે કે થિયેટર ચેઇન દ્વારા ફિલ્મ માટેની તમામ નાણાકીય લેવડ-દેવડ અને ચૂકવણીઓ સમયસર પૂર્ણ કરવામાં આવી હોવા છતાં આ કમનસીબ સ્થિતિનું નિર્માણ થયું છે. સંચાલકોએ આ વિક્ષેપ માટે ઉત્તર અમેરિકાના વિતરકો - 'શ્લોકા એન્ટરટેઈનમેન્ટ્સ' અને 'પ્રત્યંગિરા સિનેમાઝ' - તરફથી માન્ય 'કી ડિલિવરી મેસેજીસ' (KDMs) ન મળ્યા હોવાને સીધી જવાબદાર ઠેરવી છે. થિયેટરે જણાવ્યું હતું કે નિર્માતા કંપની 'સન પિક્ચર્સ' તરફથી લીલી ઝંડી મળવા છતાં વિતરકો દ્વારા જરૂરી ટેકનિકલ સહકાર આપવામાં આવ્યો નથી.

આ મામલે થિયેટર પ્રશાસને જણાવ્યું હતું કે, "અમને અત્યંત ખેદ થાય છે કે ટેકનિકલ મજબૂરીઓના કારણે અમારે આ પ્રદર્શન બંધ રાખવું પડે છે." સંચાલકોએ આ અસુવિધા બદલ દર્શકોની ક્ષમા માગી છે અને તેમની ધીરજ તથા સહકાર બદલ આભાર વ્યક્ત કર્યો છે. જો કે, આ મામલે ઉત્તર અમેરિકાના વિતરકો કે નિર્માતાઓ તરફથી હજુ સુધી કોઈ સ્પષ્ટતા કે સત્તાવાર પ્રતિક્રિયા આપવામાં આવી નથી. ઉલ્લેખનીય છે કે, નેલ્સન દિલીપકુમારના દિગ્દર્શક હેઠળ બનેલી અને અનિરુદ્ધ રવિચંદરના સંગીતથી સજ્જ આ ફિલ્મે રિલીઝ થયા બાદથી જ બોક્સ ઓફિસ પર ધમાલ મચાવી છે.