મુંબઈ : બોલિવૂડના હેન્ડસમ હંક અને 'ગ્રીક ગોડ' તરીકે ઓળખાતા ઋતિક રોશને તેની ગર્લફ્રેન્ડ સબા આઝાદના જન્મદિન નિમિત્તે સોશિયલ મીડિયા પર અત્યાર સુધીની સૌથી રોમેન્ટિક અને ભાવનાત્મક પોસ્ટ શેર કરી છે, જેના કારણે સોશિયલ મીડિયા પર ચર્ચાનો દોર શરૂ થઈ ગયો છે. લાંબા સમયથી રિલેશનશિપમાં રહેલા આ કપલે અગાઉ પણ પોતાના વેકેશન અને ક્યૂટ પળોના ફોટા શેર કર્યા છે, પરંતુ આBirthday પોસ્ટમાં ઋતિકે સબા પ્રત્યેનો પોતાનો ગાઢ પ્રેમ અનોખા અંદાજમાં વ્યક્ત કર્યો છે. આ પોસ્ટમાં સબા માત્ર ઋતિક સાથે જ નહીં, પરંતુ તેના બંને પુત્રો હ્રેહાન અને હૃધાન સાથે પણ ખૂબ જ ખુશનુમા અંદાજમાં નજરે પડી રહી છે, જેને ચાહકો દ્વારા ખૂબ જ પસંદ કરવામાં આવી રહી છે.

સબા સાથેના વેકેશનના ખાસ ફોટા શેર કરતા ઋતિક રોશને કેપ્શનમાં લખ્યું છે કે જ્યારે કોઈએ મને તમારા વિશે પૂછ્યું ત્યારે મેં કહ્યું કે હું તમારા વિશે જાહેરમાં વાત કરવા માંગતો નથી કારણ કે તમે મારા માટે અત્યંત કિંમતી છો. ત્યારબાદ તેમણે એક સુંદર ઉદાહરણ આપતા લખ્યું કે જો આપણે મુંબઈથી બીજા શહેરમાં જવું હોય અને બે વિકલ્પો હોય - એક સીધી ફ્લાઇટ અને બીજો ચાર શહેરોમાંથી પસાર થતી લાંબી ટ્રાન્ઝિટ ફ્લાઇટ, તો પણ હું સબા સાથે હંમેશાં બીજો લાંબો વિકલ્પ જ પસંદ કરીશ. ઋતિકે ઉમેર્યું કે તારી સાથે દરેક સરળ ક્ષણ અને રાહ પણ ખૂબ જ ખાસ અને મજેદાર બની જાય છે, અને અંતે "આપણી જીવનભરની સફર અને લાંબી રાહ માટે. હું તને પ્રેમ કરું છું, જન્મદિવસની શુભેચ્છાઓ" કહીને પોતાનો પ્રેમ પ્રગટ કર્યો છે.

આ વાયરલ થયેલી તસવીરમાં સબા આઝાદ ઋતિકના બંને પુત્રો હ્રેહાન અને હૃધાનની આસપાસ હાથ ફેલાવીને ઉભેલી જોવા મળે છે, જે ત્રણેય વચ્ચેના મજબૂત અને મધુર સંબંધોની સાક્ષી પૂરે છે. આ પારિવારિક બંધન અને ઋતિકની રોમેન્ટિક અંદાજવાળી પોસ્ટ પર બોલિવૂડ સેલેબ્સ તેમજ ચાહકો તરફથી શુભેચ્છાઓનો વરસાદ થઈ રહ્યો છે. ખાસ કરીને, તાજેતરના જ એક ઇન્ટરવ્યુમાં ઋતિકની પૂર્વ પત્ની સુઝાન ખાને પણ સબાની પ્રશંસા કરતા કહ્યું હતું કે ઋતિક ખૂબ જ ભાગ્યશાળી છે કે તેને સબા જેવો અદ્ભુત જીવનસાથી મળ્યો છે, જે આ પરિવારની પરિપક્વતા દર્શાવે છે.

બોલિવૂડના આ ચર્ચિત યુગલની અરસપરસની બોન્ડિંગ અને ફેમિલી સાથેના આ ફ્રેન્ડલી સંબંધો આગામી સમયમાં પણ સોશિયલ મીડિયા પર આકર્ષણનું કેન્દ્ર બન્યા રહેશે. ભૂતકાળમાં પણ આ સ્ટાર્સ પોતાની પર્સનલ લાઈફને લઈને ચર્ચામાં રહ્યા છે, અને આ પ્રકારના ક્યૂટ ખુલાસાઓ દર્શાવે છે કે તેઓ પોતાના સંબંધોને લઈને કેટલા ગંભીર છે. આગામી દિવસોમાં આ જોડી લગ્નના બંધને બંધાય છે કે નહીં તે જોવા માટે ચાહકો આતુરતાથી રાહ જોઈ રહ્યા છે.