લોસ એન્જલસઃ આંતરરાષ્ટ્રીય સ્ટાર પ્રિયંકા ચોપરાએ અમેરિકાના લોસ એન્જલસમાં આવેલા પોતાના ઘરમાં પતિ નિક જોનાસ અને પુત્રી માલતી મેરી ચોપરા જોનાસ સાથે દીવાળી ઉજવ્યાની તસવીરો ચાહકો સાથે શેર કરી છે. પોતાના ઘરે થયેલી આ ખાસ તહેવારની ઉજવણી દરમિયાનની સુંદર ક્ષણો અભિનેત્રીે સોશિયલ મીડિયા દ્વારા બહાર પાડી છે. ઇન્સ્ટાગ્રામ દ્વારા પ્રિયંકાએ આ દીવાળીની તસવીરો શેર કરી છે. ચાહકોને દીવાળીની શુભેચ્છાઓ પાઠવતા પ્રિયંકાએ શેર કરેલી આ તસવીરો પર નિક જોનાસે પ્રેમપૂર્વક કોમેન્ટ્સ પણ કરી હતી.

આ દીવાળીની ઉજવણી માટે પ્રિયંકાએ પસંદ કરેલો પોશાક ખૂબ જ આકર્ષક હતો. બરગંડી અને ગોલ્ડન રંગનો સ્ટ્રેપલેસ ગાઉન અભિનેત્રીએ પહેર્યો હતો. જટિલ જરદોઝી વર્ક, મોતી અને સોનેરી દોરાની એમ્બ્રોઈડરી આ ડ્રેસ પર કરવામાં આવી હતી. કુંદન માંગટીકા, મોટા ગોલ્ડન ઇયરિંગ્સ અને મેચિંગ બંગડીઓ સાથે પ્રિયંકાએ તેનો ટ્રેડિશનલ લુક પૂર્ણ કર્યો હતો. વાળને સરસ રીતે બાંધીને તેમાં સફેદ ગજરા લગાવવાથી અને સ્મોકી આઈ મેકઅપથી પ્રિયંકાના લુકમાં વધુ નિખાર આવ્યો હતો.

પતિ નિક જોનાસ અને પુત્રી માલતી પણ પ્રિયંકાની સાથે પારંપરિક પોશાકમાં જોવા મળ્યા હતા. ક્રીમ અને સફેદ રંગનો એમ્બ્રોઈડરી કરેલો કુર્તા સેટ નિકે પહેર્યો હતો. જ્યારે માલતીએ પિતાના પોશાક સાથે મેચિંગ કરીને સફેદ લહેંગા પહેરીને સૌનું મન મોહી લીધું હતું. અમેરિકામાં રહેવા છતાં ભારતીય સંસ્કૃતિ અને રીતિ-રિવાજો પોતાની પુત્રી માલતીને શીખવવાનું પ્રિયંકા હંમેશાં ધ્યાન રાખે છે.

લોસ એન્જલસમાં પોતાના ઘરે દશેરાની ઉજવણીના ભાગરૂપે પૂજા, શિવલિંગ અભિષેક, હવન અને કન્યાપૂજન પણ પરિવાર દ્વારા કરવામાં આવ્યા હતા. આ ઉપરાંત, પ્રિયંકાની લાગણીઓને સમજીને પોતાના વ્યસ્ત ટૂર દરમિયાન પણ કરવા ચોથ ઉજવવા માટે નિક ઘરે પહોંચ્યો હતો, જેની વાત પ્રિયંકાએ ખૂબ જ પ્રેમથી ચાહકો સાથે શેર કરી હતી.