મુંબઈ : બોલિવૂડની દિગ્ગજ અભિનેત્રી શર્મિલા ટાગોરના જીવન સાથે જોડાયેલા એક ખૂબ જ મહત્વપૂર્ણ અને જૂના રહસ્ય પરથી પડદો હટી ગયો છે. ભારતીય ક્રિકેટ ટીમના પ્રખ્યાત પૂર્વ કેપ્ટન મન્સૂર અલી ખાન પટૌડી સાથે લગ્ન કરતી વખતે શર્મિલા ટાગોરે ઇસ્લામ ધર્મ અંગીકાર કર્યો હતો અને પોતાનું નામ બદલીને આયશા રાખ્યું હતું. આ તેમનો અંગત નિર્ણય હતો, પરંતુ તે સમયે આ મુદ્દે ભારે વિવાદ થયો હતો અને આ યુગલને જાનથી નાખવાની ધમકીઓ પણ મળવા લાગી હતી.

તાજેતરમાં જ આ દિગ્ગજ દંપતીની પુત્રી, જ્વેલરી ડિઝાઇનર અને ટેરો રીડર સબા અલી ખાન પટૌડીએ આ સમગ્ર વિવાદ પર ખુલીને વાત કરી છે. સબાએ જણાવ્યું કે તેમની માતાએ આ પગલું એટલા માટે લીધું હતું જેથી લગ્ન કોઈપણ અડચણ વિના સંપન્ન થઈ શકે. તેમણે સ્પષ્ટ કર્યું કે તે સમયના સંજોગો અને પરંપરાઓ અનુસાર આ નિર્ણય લેવો જરૂરી હતો, કારણ કે તેમની દાદી આ લગ્ન માટે અન્ય કોઈ સંજોગોમાં ક્યારેય તૈયાર થાત નહીં.

સબા અલી ખાને આગળ વાત કરતા જણાવ્યું કે તે સમયની સામાજિક વ્યવસ્થા મુજબ બાળકોને કાયદેસર રીતે યોગ્ય ગણાવવા માટે પણ આ પ્રકારના નિર્ણયો લેવા પડતા હતા. ઇસ્લામના નિયમો અનુસાર જો કોઈ બિન-મુસ્લિમ વ્યક્તિ મુસ્લિમ વ્યક્તિ સાથે લગ્ન કરે છે, તો ધર્મ પરિવર્તન કર્યા વગર તે લગ્ન સ્વીકાર્ય બનતા નથી. સબાનું માનવું છે કે આ કોઈ એવી વાત નથી જેના પર લાંબો વિચાર કરવામાં આવે, પરંતુ તે સમયની જરૂરિયાત હતી જેણે બધું સરળ બનાવી દીધું.

ધર્મ પરિવર્તન છતાં શર્મિલા ટાગોરની કારકિર્દી પર થયેલી અસર વિશે વાત કરતા સબાએ જણાવ્યું કે તેમની માતાના કામ પર ક્યારેય કોઈ રોકટોક લગાડવામાં આવી ન હતી. તેમના પિતા મન્સૂર અલી ખાન ખૂબ જ ઉદાર વિચારોના ધણી હતા, જેથી શર્મિલાજી પોતાની અભિનય કારકિર્દી વિના સંકોચે ચાલુ રાખી શકી. પરિવાર દ્વારા ક્યારેય પાસપોર્ટ કે અન્ય સત્તાવાર દસ્તાવેજોમાં નામ બદલવા માટે કોઈ દબાણ કરવામાં આવ્યું ન હતું, જેના કારણે તેમની ફિલ્મી સફરમાં કોઈ અડચણ આવી નહીં.

સબાએ એવું પણ જણાવ્યું કે તેમનો પરિવાર તમામ ધર્મોનો આદર કરે છે અને તેઓએ હોળી, દિવાળી તેમજ ઈદ જેવા તમામ તહેવારો સાથે મળીને ઉજવ્યા છે. તેમના માતા-પિતાએ હંમેશાં પોતાના સંતાનોને જીવનનો રસ્તે જાતે પસંદ કરવાની સંપૂર્ણ સ્વતંત્રતા આપી છે, જેના કારણે આજનો આ પરિવાર વિવિધતામાં એકતાનું ઉત્તમ ઉદાહરણ પૂરું પાડે છે.