નવી દિલ્હી : નિતેશ તિવારીની બહુપ્રતિક્ષિત ફિલ્મ 'રામાયણ'માં ભગવાન રામની ભૂમિકા ભજવતા રણબીર કપૂર દ્વારા પહેરવામાં આવેલા ખાસ કવચને અસમના બરપેટા જિલ્લાના ૧૫ સ્થાનિક કારીગરો દ્વારા સાડા ત્રણ વર્ષની લાંબી મહેનત પછી તૈયાર કરવામાં આવ્યું છે.

પ્રાપ્ત વિગતો અનુસાર, અસમના જેનિયા બાંગલીપારા ગામના માસ્ટર કારીગર જયનલ અબ્દીન અને તેમની ટીમે વાંસની પટ્ટીઓ તથા ખાસ રબરના મિશ્રણથી આ દિવ્ય કવચ બનાવ્યા હતા, જ્યારે શરૂઆતમાં તેમને આ પ્રોજેક્ટની ગુપ્તતા જાળવવા માટે કોઈ મોટી ફિલ્મનું કામ હોવાનું જ જણાવવામાં આવ્યું હતું.

શરૂઆતમાં માત્ર શુદ્ધ વાંસમાંથી બનેલા આ કવચ પહેરીને અભિનેતાને એક્શન સીનમાં હલનચલન કરવામાં તકલીફ પડતી હોવાથી કારીગરોએ અડધું કેન અને અડધું રબર વાપરવાનો નવો પ્રયોગ કર્યો હતો, જે ખૂબ જ સફળ અને લચીલો સાબિત થયો હતો.

આ પ્રોજેક્ટ અંતર્ગત સાડા ત્રણ વર્ષમાં કુલ ૩૦ થી ૩૫ જેટલા કવચ તૈયાર કરીને ગુવાહાટી એરપોર્ટથી મુંબઈ ખાતે ફિલ્મની પ્રોડક્શન ટીમને સમયસર પહોંચાડવામાં આવતા હતા, જેથી શૂટિંગમાં કોઈ વિલંબ ન થાય.

જ્યારે ફિલ્મનું પ્રમોશન શરૂ થયું અને કારીગરોએ પોતાના હાથે વણેલા કવચ મોટા પડદે અભિનેતાના શ્રૃંગારમાં જોયા ત્યારે તેમને અહેસાસ થયો કે તેમની કળા દેશના સૌથી મોટા પૌરાણિક પ્રોજેક્ટનો મહત્વનો હિસ્સો બની છે.

આ અનોખી કલાકૃતિ અને કારીગરોની મહેનતે સાબિત કરી દીધું છે કે ભારતની પરંપરાગત હસ્તકળા કેવી રીતે વૈશ્વિક સ્તરે અને સિનેમા જગતમાં એક નવો ઇતિહાસ રચી શકે છે.