મુંબઈ : ટેલિવિઝન જગતની લોકપ્રિય અભિનેત્રી શિવાંગી જોશી હાલમાં પોતાના અંગત જીવનને લઈને ચર્ચામાં છે. અભિનેતા કુશળ ટંડન સાથેના કથિત બ્રેકઅપના કેટલાક મહિના પછી શિવાંગીએ આજના સમયના સંબંધો પર પોતાની ચૂપ્પી તોડી છે અને ખુલીને પોતાના વિચારો રજૂ કર્યા છે. 'ધ ફ્રી પ્રેસ જર્નલ' સાથેની વાતચીતમાં તેમણે આજના જમાનામાં બદલાતા પ્રેમ અને સંબંધોના સમીકરણો પર ગંભીર ટિપ્પણી કરી છે.

શિવાંગી જોશીએ વાતચીતમાં જણાવ્યું હતું કે આજકાલના સમયમાં લોકો માટે સંબંધો છોડી દેવા ખૂબ જ સરળ બની ગયું છે. તેમનું માનવું છે કે આજની પેઢીમાં સંબંધો સાચવવા માટે મહેનત કરવાની તૈયારી ઓછી થઈ ગઈ છે અને મુશ્કેલ સમય આવતા જ લોકો બહુ જ ઝડપથી સંબંધ તોડીને આગળ વધી જાય છે.

વધુ વાત કરતા તેમણે ઉમેર્યું કે લોકો આજકાલ ખૂબ જ ટેમ્પરામેન્ટલ અને અસ્થિર સ્વભાવના થઈ ગયા છે. પરિસ્થિતિ બગડે ત્યારે વસ્તુઓને સુધારવાનો પ્રયાસ કરવાને બદલે લોકો તાત્કાલિક અલગ થઈ જવાનો રસ્તો પસંદ કરે છે. જોકે તેઓ વ્યક્તિગત જરૂરિયાતોને પ્રાથમિકતા આપવાનું સમર્થન કરે છે, પરંતુ સંબંધોમાંથી ખૂબ જ સહેલાઈથી ભાગી છૂટવાની આ માનસિકતા સાથે તેઓ સહમત નથી.

ઉલ્લેખનીય છે કે વર્ષ ૨૦૨૩ માં પ્રસારિત થયેલા શો 'બ્રસાતે - મોસમ પ્યાર કા' ના શૂટિંગ દરમિયાન શિવાંગી અને કુશળની મુલાકાત થઈ હતી અને ટૂંક સમયમાં તેઓ ટેલિવિઝન ઇન્ડસ્ટ્રીના સૌથી ચર્ચિત યુગલોમાંના એક બની ગયા હતા. ઓક્ટોબર ૨૦૨૪ માં કુશળે સંબંધની પુષ્ટિ કરી હતી, પરંતુ જૂન ૨૦૨૫ માં ઇન્સ્ટાગ્રામ સ્ટોરી દ્વારા જાણ કરવામાં આવી હતી કે તેઓ પાંચ મહિના પહેલા જ અલગ થઈ ગયા છે.

આ સિવાય તાજેતરમાં રિયાલિટી શો 'લોક અપ સીઝન ૨' માં હર્ષદ ચોપરા સાથે શિવાંગીના જોડાણની ચર્ચાઓ પણ સામે આવી હતી, જોકે બંનેમાંથી કોઈએ આ અંગે સત્તાવાર સમર્થન આપ્યું નથી. સુનીતા આહુજાએ પણ સેટ પરના સહવાસને સામાન્ય ગણાવીને આ અટકળોને ફગાવી દીધી હતી. શિવાંગીના આ નિવેદને સોશિયલ મીડિયા પર ભારે ચર્ચા જગાવી છે.