Gujarati News

રાજકોટ, તા. ૯ : જાણીતા વેધરએનાલીસ્ટ શ્રી અશોકભાઈ પટેલે તા.૧૦ થી ૧૭ જાન્યુઆરી સુધીની આગાહી કરતાં જણાવ્યુ છે કે છેલ્લા બે અઠવાડીયાથી પડી રહેલ અસહ્ય ઠંડીનો આકરો રાઉન્ડ હવે પૂર્ણ થાય છે અને હવે આવતીકાલથી ઠંડીમાં રાહત મળશે.

તેઓએ જણાવેલ કે દક્ષિણ પૂર્વ અરબી સમુદ્રથી નોર્થ - વેસ્ટ મધ્યપ્રદેશ સુધી નીચલા લેવલનો ટ્રફ છે. જેના લીધે મહારાષ્ટ્ર, ગોવા, પશ્ચિમ મધ્યપ્રદેશ તેમજ લાગુ ગુજરાતના બોર્ડર વિસ્તારોમાં ગઈકાલે પણ માવઠુ થયુ હતું. હજુ આજનો દિવસ માવઠાની શકયતા છે. ગુજરાત કરતાં સૌરાષ્ટ્ર - કચ્છમાં ઠંડીનું પ્રમાણ વધુ જોવા મળે છે. જેમ કે રાજકોટ ૧૦.૨ (નોર્મલ ૧૩ ડિગ્રી), કેશોદ ૧૦.૪ (નોર્મલ ૧૨ ડિગ્રી), ભુજ ૯.૬ (નોર્મલ ૧૦ ડિગ્રી), અમરેલી ૧૦.૬ (નોર્મલ ૧૨ ડિગ્રી), અમદાવાદ ૧૪.૫ (હાલ નોર્મલ તાપમાન ૧૩ ડિગ્રી ગણાય) જયારે દિવસનું તાપમાન રાજકોટમાં ગઈકાલે ૨૬.૪, ભુજ ૨૩.૬, અમરેલી ૨૭.૬, અમદાવાદ ૨૫.૯ નોંધાયેલ. હાલમાં નોર્મલ મહત્તમ તાપમાન ૨૮ થી ૨૯ ડિગ્રી ગણાય. એટલે દિવસના પણ ટાઢોડુ જોવા મળે છે.

વેધરએનાલીસ્ટ શ્રી અશોકભાઈ પટેલે તા.૧૦ થી ૧૭ જાન્યુઆરી સુધીની આગાહી કરતાં જણાવેલ કે દિવસનું તાપમાન જે હાલ નોર્મલથી ઘણું નીચુ રહે છે તે આવતીકાલથી નોર્મલે પહોંચી જશે. આગાહી સમયમાં પણ દિવસનું તાપમાન નોર્મલ અથવા નોર્મલથી ઉંચુ રહેશે. આવતીકાલથી ઠંડીમાં પણ રાહત મળશે. જેથી તા.૧૦ થી ૧૨ જાન્યુઆરીમાં ન્યુનતમ તાપમાન નોર્મલ અથવા આંશિક વધારે તા.૧૩-૧૪ અને ૧૬ ફકત સૌરાષ્ટ્રના સિમિત ભાગોમાં ઠંડીનો ચમકારો જોવા મળશે. તા.૧૫ થી ૧૭ દરમિયાન ન્યુનતમ તાપમાન ફરી નોર્મલ તરફ પહોંચી જશે.

તા.૧૨ થી ૧૭ દરમિયાન ભેજનું પ્રમાણ પણ ઘટી જશે. તા.૧૧થી ભેજમાં ઘટાડો થવાનું શરૂ થઈ જશે. પવનો મુખ્યત્વે વધુ વિસ્તારમાં ઉત્તરના ફૂંકાશે. ગુજરાતમાં અમુક વિસ્તારમાં કયારેક પૂર્વ દિશામાંથી પણ પવન ફૂંકાય. હાલ પવનની ઝડપ વધુ જોવા મળે છે. જે તા.૧૦ સુધી રહેશે. તા.૧૧-૧૨ના આંશિક ઘટશે. તા.૧૨ થી ૧૭ જાન્યુઆરી સુધી પવનનું પ્રમાણ પણ ઓછુ થઈ જશે. ૫ થી ૧૫ કિ.મી.ની ઝડપે પવન ફૂંકાશે.