Gujarati News

અમદાવાદ,તા.૧ : શહેરના સૌથી ભરચક વિસ્તારો પૈકી એક લાલ દરવાજા વિસ્તારમાં ગુરૂવારે સાંજે કંઈક એવું બન્યું જેને જોઈને રસ્તા જતે દરેક લોકો ઉભા રહી ગયા. અમદાવાદના કારંજ પોલીસ સ્ટેશનની હદમાં આવતા લાલ દરવાજા અને રિલીફ રોડ પર અનેક રૂપલલનાઓ દેહવિક્રય માટે રોજ ઉભી રહે છે. આ મહિલાઓ સાથે ગ્રાહકોનો સોદો કરાવતો એક દલાલ પણ અહીં હાજર હોય છે.

પરંતુ ગુરૂવારે સાંજે આ રૂપલલનાઓએ કોઈ બાબતે દલાલ સાથે વાકું પડતા તેને જાહેરમાં દોડાવીને માર માર્યો હતો. આ દલાલ ભાગતો ભાગતો છેક પોલીસ કમિશનર કચેરી શાહીબાગ સુધી પહોંચ્યો હતો જેની પાછળ રિક્ષામાં ૭-૮ રૂપલલનાઓ પીછો કરતી કરતી પહોંચી તો દલાલ પોલીસ કમિશનર કચેરીના ગેટ પાસે પહોંચ્યો અને બચાવો બચાવોની બૂમો પાડી રહ્યો હતો. તેમ છતા રૂપલલનાઓ આ દલાલને પોલીસ કમિશનર કચેરીના ગેટની સામેથી ઢસડીને રોડની બીજી તરફ લઈ ગઈ હતી અને જોરદાર ફટકાર્યો હતો. બનાવના મળતા અહેવાલ મુજબ સાંજના સમયે અચાનક એક યુવક બચાવો બચાવો કરતો પોલીસ કમિશનર કચેરીના ગેટ પર પહોંચ્યો હતો.

હાજર પોલીસ કંઈ સમજે તે પહેલા જ પાછળથી બે-ત્રણ રિક્ષામાં આવેલી મહિલાઓ ઉતરીને આ યુવકને મારવા લાગી હતી. કમિશન કચેરીના ગેટ પર બેઠેલા પોલીસ કર્મીઓ બધો તમાસો જોઈ રહ્યા હતા પરંતુ કોઈ મધ્યસ્થી કરી રહ્યું ન હતું. થોડીવારમાં મહિલાઓ યુવકને ખેચીને રોડની સામેની તરફ લઈ ગઈ અને ત્યાં પણ જોરદાર ફટકાર્યો હતો. મહિલા અને માર ખાનાર યુવકની વચ્ચે થતી વાતચીત પરથી બહાર આવ્યું હતું કે આ મહિલાઓ રતન પોળ રિલીફ રોડ પાસે જાહેરમાં દેહ વિક્રય માટે ઉભી રહે છે. આ યુવક ત્યાં આવતા ગ્રાહકોની પાછળ હોટેલ સુધી જતો અને તેનો વીડિયો ઉતારી લેતો. જે બાદ ગ્રાહક બહાર નીકળે એટલે તેને ધમકાવીને રૂપિયા માગતો હતો.

જેથી આ રૂપલલનાઓએ યુવકને સબક શીખડાવવા માટે આ પ્રકારે દોડાવીને માર માર્યો હતો. આ પહેલો કિસ્સો નથી અમદાવાદના કારંજ પોલીસ સ્ટેશનની હદમાં દેહ વિક્રય ઉપરાંત ઘણા સમયથી ર્ડ્ગ્સ સહિતના નશીલા પદાર્થો પણ વેચાય છે. જે સ્થાનિક પોલીસ પકડી શકતી નથી પણ અન્ય એજન્સીઓ ત્યાં આવીને ડ્રગ્સ ડિલર, પેડલર તેમજ ડ્રગ્સના મુદ્દામાલને પકડી જાય છે. સતત નિષ્ફળ રહેલી કારંજ પોલીસની હદમાં ડી સ્ટાફ પોલીસ અને ગુનેગારોની મદદ ખૂબ જ આંખે ઉડીને દેખાય તેવી છે. આ જ વિસ્તારમાં વર્ષોથી ચાલતા દેહવ્યાપારને કેટલાક પોલીસવાળાઓએ રોકડીનું સાધન બનાવી દીધું છે. તેવું આ ઘટના પરથી દેખાય છે.