Gujarati News

વડોદરા, તા.૩ : સ્વીટીના હત્યારા અજય દેસાઈને કડકમાં કડક સજા કરાવવા માટે તેના પરિવારજનોએ કમર કરી છે. સ્વીટી પટેલ ગુમ થયા ત્યારથી તેમને શોધવા માટે કેમ્પેઈન ચલાવનારા તેમના ઓસ્ટ્રેલિયા સ્થિત દીકરા રિધમ પંડ્યાએ હવે માતાના હત્યારાને કડક સજા થાય તેવી માગ કરી છે. જ્યાર સ્વીટી પટેલની કોઈ ભાળ નહોતી મળી રહી ત્યારે રિધમે ફેસબુક પર વેર ઈઝ માય મૉમ નામથી પેજ બનાવીને ઓનલાઈન લડત ચલાવી હતી.

હવે જ્યારે સ્વીટીનું મર્ડર થયું હોવાનું કન્ફર્મ થઈ ચૂક્યું છે ત્યારે રિધમે આ પેજનું નામ બદલીને જસ્ટિસ ફોર માય મોમ કરી દીધું છે. સ્વીટીના પહેલા લગ્ન હેતસ પંડ્યા નામના વડોદરાના વ્યક્તિ સાથે થયા હતા.

લગ્નજીવન દરમિયાન તેમને બે પુત્ર અવતર્યા હતા. જોકે, ડિવોર્સ બાદ હેતસ બંને દીકરા સાથે ઓસ્ટ્રેલિયા સ્થાયી થયા હતા. રિધમે ગઈકાલે મૂકેલી એક પોસ્ટમાં જણાવ્યું હતું કે, છેલ્લા ઘણા દિવસથી તેણે આ પેજ પર કોઈ પોસ્ટ નથી મૂકી અને તે કોઈના સંપર્કમાં પણ નથી. તેણે લખ્યું છે કે, તેઓ માનસિક રીતે આ આઘાતને સહન કરવા માટે તૈયાર નહોતા તેમજ પોતાને થોડો સમય આપવાની સાથે પ્રાઈવસી ઈચ્છતા હતા.

જે લોકોએ પોતાને અત્યાર સુધી મદદ કરી છે તે સૌનો આભાર માનતા રિધમે જણાવ્યું છે કે સચ્ચાઈ તો હવે સામે આવી ચૂકી છે, પરંતુ ખરી લડાઈ હવે શરુ થવાની છે.

રિધમે આગળ જણાવ્યું છે કે અત્યાર સુધી મીડિયા તેમજ શુભેચ્છકોએ જે મદદ કરી તેનાથી મોટી મદદની જરુર હવે પડવાની છે. તેણે માગ કરી છે કે મારી મમ્મીને આવી અમાનવીય મોત આપનારાને અને અમારા બે વર્ષના ભાઈ અંશને માતાથી અલગ કરી દેનારાને કડક સજા મળે તે જ તેમનો ધ્યેય છે.

તેણે લખ્યું છે કે પોલીસ તેનું કામ કરી જ રહી છે, છતાંય ન્યાય માટે સૌનો સાથ જોઈશે. સ્વીટીનો પતિ અજય દેસાઈ હાલ અમદાવાદ ક્રાઈમ બ્રાંચના ૧૧ દિવસના રિમાન્ડ પર છે.

આ કેસના ફરિયાદી એવા સ્વીટીના ભાઈ જયદીપ પટેલે અજય દેસાઈ પર અનેક ગંભીર આક્ષેપ પણ કર્યા છે. જેમાં તેઓ લાખો રુપિયાનો વહીવટ કરતા હોવાની સાથે તેમણે સ્વીટીથી કેટલીક વિગતો છૂપાવી હોવાના આક્ષેપનો પણ સમાવેશ થાય છે.

અજય દેસાઈ વિરુદ્ધ જયદીપ પટેલે એન્ટિ કરપ્શન બ્યૂરોમાં પણ અરજી કરી છે અને તેણે કઈ રીતે મોંઘીદાટ એવી જીપ કમ્પાસ કાર ખરીદી તેમજ તેની પાસે આટલા રુપિયા ક્યાંથી આવ્યા તે તપાસ કરવા માટે વિનંતી કરી છે.

જયદીપ પટેલ દ્વારા રાજ્યના ડીજીપી અને હ્યુમન રાઈટ કમિશનને પત્ર લખીને પણ શરુઆતના તબક્કામાં વડોદરા પોલીસ દ્વારા તપાસમાં અપનાવાયેલી ઢીલ પર પણ ગંભીર સવાલ ઉઠાવી જવાબદાર અધિકારી સામે પગલાં લેવા જણાવાયું છે. ઉલ્લેખનીય છે કે, વડોદરા પોલીસને એક મહિનાથી પણ વધુ સમય સુધી અજય દેસાઈ ગોળ-ગોળ ફેરવતો રહ્યો હતો.

જે પુરાવાના આધારે અમદાવાદ ક્રાઈમ બ્રાંચે અજય દેસાઈને માત્ર ત્રણ જ દિવસની તપાસમાં જેલભેગો કરી દીધો તે પુરાવા વડોદરા પોલીસને કેમ ના દેખાયા તે સવાલ પણ મૃતકના ભાઈ દ્વારા ઉઠાવવામાં આવ્યો છે.

આ સિવાય, સ્વીટીના મર્ડર બાદ તેના અને અજય દેસાઈના બે વર્ષના દીકરા અંશની કાયદેસર રીતે કસ્ટડી મેળવવા માટે પણ સ્વીટીના ભાઈએ કાર્યવાહી હાથ ધરી છે.

હાલ અંશ અજય દેસાઈની કાયદેસરની પત્ની પૂજા દેસાાઈ પાસે હોવાનું જણાવાઈ રહ્યું છે. જોકે, જયદીપ પટેલે એવો આક્ષેપ કર્યો છે કે અંશની યોગ્ય રીતે સંભાળ ના રખાઈ રહી હોવાથી તેની કસ્ટડી તેમને સોંપવામાં આવે. ૦૫ જૂનના રોજ સ્વીટીનું મર્ડર કરીને અજય દેસાઈએ સ્વીટીના ભાઈ જયદીપને ફોન કરીને જણાવ્યું હતું કે સ્વીટી ઝઘડો થયા બાદ ઘર છોડીને ક્યાંક ચાલી ગઈ હતી.

જયદીપ પટેલ કરજણમાં આવેલા અજય દેસાઈના ઘરે પહોંચ્યા ત્યાં સુધીમાં તેમણે સ્વીટીની લાશને ધાબળામાં લપેટીને ગાડીમાં ગોઠવી દીધી હતી. અજય દેસાઈ સાંજના સમયે જયદીપ પટેલને અંશની સંભાળ રાખવાનું કહીને સ્વીટીની લાશને લઈને પોતાની ગાડી લઈને નીકળી ગયા હતા. તેમણે એવું કહ્યું હતું કે તેઓ સ્વીટીને શોધવા માટે જાય છે.

જોકે, તેઓ ખરેખર સ્વીટીના લાશનો નિકાલ કરવા ગયા હતા. સ્વીટીની બોડીને દહેજના અટાલી ગામમાં આવેલી એક બિલ્ડિંગમાં સળગાવીને તેઓ રાત્રે ઘરે પરત ફર્યા હતા.

બીજી તરફ, સ્વીટીનો કોઈ પત્તો ના લાગતો હોવાથી જયદીપ પટેલ અંશને પોતાના ઘરે થોડા દિવસ માટે લઈ ગયા હતા. પરંતુ અંશ મમ્મી-પપ્પા વિના રહેતો ના હોવાથી તેને તેઓ ફરી અજય દેસાઈને ત્યાં મૂકી આવ્યા હતા. સૂત્રોનું માનીએ તો, ત્યારબાદ અજય દેસાઈએ અંશને પોતાના અમદાવાદ સ્થિત એક મિત્રના ઘરે મૂક્યો હતો.

જોકે, દિવસો વિતતા અજય દેસાઈ પર જ શંકા મજબૂત બનતા તેમનો આ મિત્ર અંશને અજય દેસાઈને ત્યાં ફરી મૂકી આવ્યો હતો અને ત્યારે અજય દેસાઈએ અંશને કોઈ બીજા વ્યક્તિને ત્યાં મૂક્યો હતો.

આખરે અજય દેસાઈએ જ સ્વીટીનું મર્ડર કર્યું છે તેવું ક્રાઈમ બ્રાંચની તપાસમાં સામે આવ્યા બાદ તેમની ધરપકડ કરાઈ હતી અને ત્યારથી અંશની કસ્ટડી અજય દેસાઈની કાયદેસરની પત્ની પૂજા દેસાઈ પાસે હોવાનું જાણવા મળી રહ્યું છે. ઉલ્લેખનીય છે કે, પૂજા દેસાઈને પણ અજયથી એક બાળક છે, અને તેની ઉંમર અંશ જેટલી જ છે.