Gujarati News

સુરત,તા.૫ :  મુસ્લિમ યુવતીના પ્રેમમાં પડેલા ક્રિશ્ચિયન પ્રેમિકા સાથે લગ્નના થતાં બંને વચ્ચે ૨૦૧૪માં બ્રેકઅપ થયું હતું. જોકે, પ્રેમિકા ૨૦૧૮માં ફરી તેના સંપર્કમાં આવતા બંને વચ્ચે ફરી અફેર શરુ થયું હતું. જેની જાણ યુવકની પ્રેમિકાના પતિને થઈ જતાં તેના પર જીવલેણ હુમલો કરવામાં આવ્યો હતો. આ મામલે મહિધરપુરા પોલીસે યુવતીના પતિની હત્યાના પ્રયાસના ગુનામાં ધરપકડ કરવાની તજવીજ શરુ કરી છે. આ ઘટનની વિગત એવી છે કે, બેગમપુરા વિસ્તારના ચીડિયાકૂઈમાં રહેતા કાર્તિક ડિસોઝા (ઉં. ૨૯ વર્ષ) એલિવેટર ટેકનિશિયન તરીકે કામ કરે છે. ૨૦૧૧ના અરસામાં તેમના પાડોશી મોહમંદ ઝુબેરના મામાની દીકરી અફસાના સાથે કાર્તિકને દોસ્તી થઈ હતી. અફસાના ઝુબેરના ઘરે આવતીજતી રહેતી હતી, અને ત્યાં જ તે કાર્તિકના સંપર્કમાં આવી હતી, અને બંને વચ્ચેની દોસ્તી સમય જતા પ્રેમસંબંધમાં પરિણમી હતી.

               જોકે, આ લવસ્ટોરીમાં ટ્વીસ્ટ ત્યારે આવ્યો જ્યારે અફસાનાના પરિવારજનોએ ૨૦૧૪માં તેને મોહંમદ ઝુબેર સાથે જ પરણાવી દીધી. અફસાનાના લગ્ન થઈ જતાં તેની અને કાર્તિકની લવસ્ટોરીનો પણ એન્ડ આવી ગયો હતો. જોકે, ૨૦૧૮માં બંનેએ ફરી મળવાનું શરુ કર્યું હતું. આ દરમિયાન કાર્તિકે ધર્મપરિવર્તન કરીને ઈસ્લામ અંગીકાર કર્યો હતો. જોકે, અફસાનાએ પોતાના જૂના પ્રેમીને ફરી મળવાનું શરુ કર્યું છે તેની જાણ તેના પતિ મોહમ્મદ ઝુબેરને થઈ ગઈ હતી. જેના પછી આ મામલે તેની અને કાર્તિક વચ્ચે જોરદાર બબાલ પણ થઈ હતી. પરંતુ થોડા સમય બાદ બંને વચ્ચે સમાધાન પણ થઈ ગયું હતું અને કાર્તિક અફસાનાને કાયમ માટે ભૂલી જશે તેવી વાત પણ થઈ હતી. પરંતુ તેમ છતાંય મોહમ્મદ ઝુબેરના મનમાં એવો વ્હેમ હતો કે કાર્તિક અને અફસાના વચ્ચેનું અફેર હજુય ચાલુ જ છે. તેવામાં ગુરુવારે રાત્રે કાર્તિક ઝુબેરના ઘરની પાસે રહેતા પોતાના માસીના ઘરે જમવાનું લેવા માટે ગયો હતો. તે વખતે ઝુબેર તેને જોઈ ગયો હતો અને કાર્તિકને પાઠ ભણાવવાના હેતુથી તેણે તેનો પીછો કર્યો હતો.

કાર્તિક પોતાના બાઈક પર લોખંડવાલા કમ્પાઉન્ડના ગેટ પાસેથી નીકળતો હતો ત્યાં જ ઝુબેરે તેની સાથે બબાલ શરુ કરી ચાલુ બાઈક પર જ તેને ચાકૂના ઘા ઝીંકી દીધા હતા. ઝુબેરે અચાનક હુમલો કરતાં ઘાયલ થયેલા કાર્તિકે બાઈકના સ્ટિયરિંગ પરથી કાબૂ ગુમાવ્યો હતો અને તે રસ્તા પર સ્લીપ થઈ ગયો હતો. બીજી તરફ, હુમલો કરીને ઝુબેર ત્યાંથી પલાયન થઈ ગયો હતો જ્યારે લોહીલૂહાણ હાલતમાં રસ્તા પર પડેલા કાર્તિકને સારવાર માટે તાત્કાલિક હોસ્પિટલમાં ખસેડાયો હતો. આ મામલે કાર્તિકે ઝુબેર વિરુદ્ધ ફરિયાદ આપતા પોલીસે તેને પકડવા માટેના ચક્રો ગતિમાન કર્યા છે.