Gujarati News

અમદાવાદ :શિક્ષકોની કામગીરીના સમયમાં વધારા અંગે સરકાર દ્રારા જારી કરાયેલા પરિપત્રને શિક્ષણ વિભાગ દ્રારા પરત ખેંચવામાં આવ્યો છે. આ નિર્ણયને લઇને ગુજરાત પ્રદેશ કોંગ્રેસ સમિતિના મુખ્ય પ્રવકતા ડો. મનીષ દોશીએ જણાવ્યું છે કે, શિક્ષણ વ્યવસ્થામાં અંધાધૂધી – અરાજકતા ઉભા કરતા પરિપત્રો – નિર્ણયો સામે સમગ્ર શિક્ષણ સમુદાયમાં વ્યાપક રોષ ફેલાઇ ગયા બાદ પરિપત્રો પરત ખેંચવાની સરકારને ફરજ પડે છે. જે ભાજપ સરકારની નિષ્ફળતાના દર્શન કરાવે છે.

ભાજપ સરકારના અણઘડ, અવિચારી નિર્ણયો અને ભ્રષ્ટાચારી – દિશાવિહીન શિક્ષણ વિભાગ પર આકરા પ્રહાર કરતા ગુજરાત પ્રદેશ કોંગ્રેસ સમિતિના મુખ્ય પ્રવક્તા ડૉ. મનિષ દોશીએ વધુમાં જણાવ્યું હતું કે, ભાજપ સરકારનો ભ્રષ્ટ શિક્ષણ વિભાગ શિક્ષકોના સમય ફેરફાર મામલે ફતવો જાહેર કર્યો હતો. શિક્ષકો પાસે શિક્ષણ સિવાય 60 જેટલા અન્ય કામ કરાવી ભાજપ સરકારે શિક્ષકોનું અપમાન કરી રહી છે. ભાજપ સરકાર દ્વારા દર વખતે યુ ટર્ન તેમની નિષ્ફળતા જાહેર કરી રહી છે. સાથોસાથ શિક્ષણ વ્યવસ્થામાં અંધાધુધી અને અરાજકતાનું વાતાવરણ ખુદ ભાજપ સરકાર જ ઉભું કરી રહી છે. વારંવાર અવિચારી પરિપત્રો કરીને શિક્ષકોના સ્વમાન અને સન્માન પર હુમલો કરનાર અધિકારીઓ સામે શિક્ષાત્મક – દંડાત્મક કાર્યવાહી કરવી અત્યંત જરૂરી છે. જેથી કરીને ગુજરાતની શિક્ષણ વ્યવસ્થામાં સુમેળભર્યુ વાતાવરણ બની રહે.

ReplyReply to allForward