Gujarati News

હાલ ગુજરાતમાં મેઘરાજાએ વિરામ લીધો છે. જેને લઈને રાજ્યની નદીઓમાં પુરની સ્થિતિ કાબુમાં આવી છે. સાથે સાથે નદીઓ પર બાંધવામાં આવેલા ડેમની જળ સપાટી પણ સ્થિર થઇ છે. પરંતુ નર્મદા નદી ઉપર બાંધવામાં આવેલા સરદાર સરોવર ડેમમાં ગઈ કાલે પાણીનું સ્તર ઘટ્યા બાદ આજે ફરીથી પાણીની આવકમાં વધારો થતા ડેમની જળ સપાટી 135.93 મીટરે પહોંચી હતી.

મળતી માહિતી અનુસાર ઉપરવાસમાં ભારે વરસાદને પગલે નર્મદા ડેમમાં નવા નીરની આવક ચાલુ છે. ડેમની જળસપાટીમાં ગઈ કાલે ઘટાડો નોંધાયો હતો પરંતુ આજે ફરીથી ઉપરવાસમાંથી 1 લાખ 62 હજાર કયુસેક પાણી સરદાર સરોવર ડેમમાં આવતા ડેમની જળ સપાટી વધીને ફરીથી 135.93 મીટર સુધી પહોંચી હતી. હાલ ડેમના 10 દરવાજા 1.5 મીટર સુધી ખુલ્લા છે જેથી ડેમમાંથી 1 લાખ 61 હજાર ક્યુસેક પાણીની કુલ જાવક થઇ રહી છે.