Gujarati News

અમદાવાદ,તા.૨૩: ઘણીવાર તમે પોતાના યુનિફોર્મ અથવા હોદ્દાને કારણે લોકો આગળ રોલો પાડતા પોલીસ અધિકારીઓ જોયા હશે. પરંતુ તાજેતરમાં જ એક પોલીસ અધિકારીને પોતાના પહેરવેશ અને આ વલણને કારણે ઠપકો સાંભળવો પડ્‍યો હોવાની જાણકારી સામે આવી છે. એક પોલીસ અધિકારી જયારે કોર્ટમાં ટી-શર્ટ પહેરીને પહોંચ્‍યા તો જજે તેમને કાયદાનો પાઠ ભણાવ્‍યો હતો. ઉલ્લેખનીય છે કે ચકચાર મચાવનારા ખાડિયા હત્‍યા કેસમાં ઝડપાયેલા આરોપીને ક્રાઈમ બ્રાન્‍ચના ઈન્‍સ્‍પેક્‍ટરે રિમાન્‍ડ માટે કોર્ટમાં રજૂ કર્યો હતો. અને આ જ દરમિયાન તેમણે ટી-શર્ટ પહેરેલી હતી.

ક્રાઈમ બ્રાન્‍ચ કક્ષાના પોલીસ અધિકારીને આ પ્રકારે કોર્ટ પરિસરમાં ટી-શર્ટમાં જોઈને જજ રોષે ભરાયા હતા. કોર્ટે ઈન્‍સ્‍પેક્‍ટરને કહ્યું કે, ભલે તમને ડ્રેસમાંથી મુક્‍તિ મળી ગઈ હોય પરંતુ એક અધિકારી થઈને આ રીતે ટી-શર્ટ પહેરીને કોર્ટમાં કેવી રીતે આવી શકાય? આ સાથે જ કોર્ટે આરોપીના રિમાન્‍ડ પણ રદ્દ કર્યા હતા અને તેને પાછો જેલમાં મોકલવાનો આદેશ આપ્‍યો હતો.

આટલુ જ નહીં, કોર્ટે પોલીસ કમિશનરને પીઆઈ સામે કાર્યવાહી કરવાનો પણ આદેશ આપ્‍યો છે. કોર્ટે નોંધ્‍યું છે કે, તપાસ અધિકારી કોર્ટમાં ટી-શર્ટ પહેરીને આવ્‍યા હતા અને આ બાબતે તે ચોક્કસ ખુલાસો પણ આપી શક્‍યા નથી. અધિકારી સામે યોગ્‍ય કાર્યવાહી કરવા માટે ઓર્ડરની નકલ મોકલી આપવામાં આવી છે.

ઉલ્લેખનીય છે કે ખાડિયા વિસ્‍તારમાં મોન્‍ટુ નામદાર અને તેના સાથીદારોએ મળીને હત્‍યાને અંજામ આપ્‍યો હતો. આ કેસમાં પોલીસે સુનિલ બાબુભાઈ બજાણિયાની ધરપકડ કરી હતી. તેના રિમાન્‍ડ મેળવવા માટે તપાસ અધિકારીએ કોર્ટમાં હાજર કર્યો હતો. ઉલ્લેખનીય છે કે ક્રાઈમ બ્રાન્‍ચ સહિતની એજન્‍સીઓને ડ્રેસમાંથી મુક્‍તિ આપવામાં આવી છે. પરંતુ કોર્ટે જણાવ્‍યું કે, ક્રાઈમ બ્રાન્‍ચના અધિકારીઓ પોલીસ કમિશનરના લાડકવાયા હોય છે, માટે તે કોઈ કાર્યવાહી કરશે નહીં. પરંતુ હું તેમને આ બાબતની જાણકારી આપું તે જરૂરી છે.